Cultura

Xulio Arbesú presenta «Les siete novies del rei»

28/11/2009 a les 01:41:20

L'escritor Xulio Arbesú presenta esti domingu 29 de payares el so últimu llibru Les siete novies del rei (Suburbia Ediciones). L'actu va ser a les 17.30 hores na carpa de l'asociación de festexos de L'Entregu, instalada na plaza La Llaguna. Na presentación van intervenir Hildegart Blanco, presidenta de l'asociación de festexos; Aurora Suárez Carrio, directora del grupu de teatru Refaxu; Silvia Cosío, editora; y el propiu autor.

La trama que se desenvuelve en Les siete novies del rei xira alredor de la promesa de matrimoniu del rei a siete moces. Pa decidir cuála va ser la escoyida, les rapaces han pasar una riestra de pruebes. El propiu autor esplica qué lu llevó a escribir esti testu: «Equí me tenéis a mi, que soi de los de tarariar l'himnu de Riego tolos catorce d'abril escribiendo una obra monárquica dedicada a aquel rei asturianu que, según remotes cróniques, vivió nel valle del Nalón, y valió pa da-y apellíu al conceyu de Samartín. Con un protagonismu tan femenín y numberosu, nun podía asemeyase muncho a La venganza de don Mendo. Hubi de renunciar a tan prestosu modelu, pero vive Dios que nun contaba renunciar a tres coses: que la obra diba ser cómica, y escrita en versu, y con una escena a base de pallabres esdrúxules».

Xulio Arbesú tien escrites noveles tan diferentes como la histórica Potestas, la xuvenil Misión Pelayo, la interiorista Un raposu en Tresmonte y la costumista El pisu d'enriba. Amás, l'escritor ta acabante de ganar el Premiu d'Ensayu Fuertes Acevedo que convoca la Conseyería de Cultura cola obra El destín treshumanu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam