Llingua

Xesús Rodríguez Martínez da a conocer el so proyectu didácticu de filosofía n'asturianu

REDACCIÓN. UVIÉU - 21/11/2011 A LES 10:55:27

El miércoles 23 de payares, a les 19 hores, dientro de les X Xornaes de Lliteratura Infantil y Xuvenil de Samartín del Rei Aurelio, la Casona del Bravial de Blimea va recibir la visita del maestru Xesús Rodríguez Martínez. Va esponer el so proyectu Ciencia y Filosofía n’asturianu, que tien como base’l llibru dixital de fiches didáctiques publicáu en mayu del 2011 nel númberu tres de la revista de biblioteques escolares de la Conseyería d'Educación y Universidaes @bareque. Esti trabayu tien bien d’apoyos d'instituciones educatives de la máxima autoridá, como la Conseyería d"Educación y Universidaes, los C.P.R. de Xixón y d’Avilés, el Ministeriu d’Educación y el Ministeriu de Ciencia y Anovación.

Na presentación del so trabayu, l’autor va tar acompañáu poles responsables de la revista @bareque, Lucía Gutiérrez García, de la Conseyería d’Educación y Universidaes, y Mercedes Ruisánchez Gutiérrez, del CPR d’Avilés. L’actu va tar presentáu por Gema Suárez Torre, conceyala de Cultura de Samartín del Rei Aurelio, y por Hugo Cortina Fanjul, responsable de la Oficina de Normalización Llingüística.

L'aspectu más importante d'esti programa ye que se faen les actividaes col métodu AICLE (Aprendimientu Integral de Conteníos al traviés de les Llingües), esto ye, dar a conocer los xuegos y posibilidaes del llinguaxe al traviés de llectures de testos y fiches didáctiques (tamién na rede), esperimentos científicos cenciellos, xuegos orales, xeres artístiques y inxerimientu d’exercicios de llingüística comparada (vocabulariu llatín-asturianu-castellanu-inglés), que-yos valgan a neños y neñes p’ameyorar la competencia comunicativa n’asturianu. Coles actividaes contemplaes nel trabayu, l'autor quier da-y importancia a l'asignatura d'asturianu como área curricular llegal.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam