Llingua

La XDLA entama una campaña pa pidir más asturianu na RTPA

23/02/2010 a les 18:16:44

La Xunta pola Defensa de la Llingua Asturiana (XDLA) entama una campaña pa «esixir un cambiu na actitú de la Radio Televisión del Principáu d’Asturies (RTPA) hacia’l patrimoniu llingüísticu asturianu», col oxetivu d’acabar cola presencia «tan precaria» de la llingua asturiana na programación d’esti ente públicu. La iniciativa de la XDLA consiste n’animar a la ciudadanía a que mande correos a los miembros de la dirección de la RTPA «pa demostrar la demanda qu’hai de más programación n’asturianu». El colectivu en defensa l’idioma va ufrir un modelu de carta que pue descargase na web de la XDLA, onde tamién van tar les señes de corréu electrónicu a les qu’unviar los mensaxes.

Na carta esplícase que’l patrimoniu llingüísticu asturianu «cuerre un peligru claru de desaparición porque la llingua ta dexando de tresmitise a les xeneraciones más nueves». Nesti sen, la XDLA sostién que «fai falta tomar midíes polítiques y llegales urxentes pa mirar de tornar la situación». La organización recuerda que, anque la televisión ye «un vehículu poderosu d’uniformización llingüística», tamién ye «una vía fundamental de recuperación llingüística pa promocionar y dar prestixu a llingües minorizaes que muncha xente tovía asocia a prexuicios y sentimientos de vergüenza». Otra de les cuestiones que se recueyen na carta ye que la propia RTPA tien ente los sos fines la promoción del asturianu y dizse que la canal pública «nun pue mirar pa otru llau mientres ve cómo se sume’l patrimoniu llingüísticu d’Asturies».

La XDLA remarca que la programación n’asturianu yá cuenta «col apoyu claru de l’audiencia», anque critica que ye «escasísima». Por esti motivu, el colectivu considera qu’había qu’aumentar la programación n’asturianu y enanchar la temática, el públicu potencial y l’horariu nel que s’emite. La XDLA empondera que s’atienda al públicu adulto n’espacios dedicaos a la cultura asturiana y a la tradición, pero reclama nesta carta que «se faiga un esfuerzu especial col públicu infantil». La organización valora que la ufierta «amplísima» de programación infantil en castellanu «tien que tener na RTPA una contrapartida con programación propia n’asturianu o doblada a esta llingua». Pa la XDLA, «namás d’esa manera los neños y neñes van poder sentir na televisión la llingua de casa». Ello ye que na carta apúntase que «si nun lo fai la televisión pública asturiana, ¿quién lo va facer?».

El potencial normalizador de la RTPA destácalu la XDLA, nel sentíu de que da la posibilidá de visibilizar l’idioma n’ámbitos nos qu’hasta agora nun tuvo presencia bastante, polo que’l colectivu afirma que ye «fundamental» que se faigan n’asturianu programes informativos, retresmisiones deportives o programes d’entretenimientu, y qu’empiece a apaecer en series de ficción, bien con producción propia o bien col doblaxe.

Amás, la XDLA indica que na programación en castellanu de la RTPA «ye indispensable tanto’l conocimientu de la realidá llingüística asturiana como l’usu sistemáticu de la toponimia oficial». La XDLA cree que, depués de tres años d’emisiones de la RTPA, estes cuestiones tiene un tratu «deficiente». La organización apunta que va dos meses yá mandó al director de la RTPA y a la directora xeneral de Política Llingüística una carta faciendo delles suxerencies sobre esta cuestión ensin que se tuviera respuesta nenguna.

La carta modelu pa esta campaña acaba d’esta manera: «La televisión pública ta llamada a tener un papel fundamental na promoción del patrimoniu llingüísticu asturianu y esto nun se pue facer con un tratu marxinal, testimonial o parcial, sinón planificando pal idioma propiu un espaciu cada vez más ampliu n’hores y en temática y, siempre, col mayor de los procuros pa qu’esi modelu d’asturianu sía correctu, cuidáu y ellaboráu por profesionales con solvencia llingüística contrastada».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam