Les Noticies.com. Diariu dixital. 21-05-2012
La XDLA denuncia'l despreciu de la SGAE al asturianu
REDACCIÓN. UVIÉU - 22/02/2012 A LES 14:56:59Sabino Méndez, portavoz de la Xunta Directiva de la SGAE y presidente de l’Academia de la Música despreció la llingua asturiana nunes declaraciones feches al diariu El País el 20 de febreru. El máximu responsable de la sociedá, tres la imputación de Teddy Bautista, afirmó, nun artículu nel que s’analizaben les causes principales poles qu’esti añu nun se van celebrar los Premios de la Música, qu'«el premiu a la meyor canción en bable nun ye mui seductor», como exemplu de que l’espectáculu nun resulta atractivu al públicu.
La Xunta pola Defensa de la Llingua Asturiana (XDLA) manifestó la so indignación por estes palabres «que vienen a reflexar el despreciu de la SGAE pol idioma asturianu y suponen un insultu pa tolos asturianos». «Depués d’años de llucha pa que los Premios de la Música incluyeren una categoría pa los cantares fechos n’asturianu, nes mesmes condiciones que pa les demás llingües del Estáu, agora’l presidente de la institución vuelve a dexar la música fecha n’asturianu en condiciones de desigualdá y desprestixu, amás de despreciar la calidá del llabor de los músicos asturianos», diz la Xunta.
La XDLA esixe la dimisión inmediata de Sabino Méndez y que l’Academia de les Artes y les Ciencies, institución responsable de los Premios, rectifique públicamente les palabres del máximu responsable porque, si non, entenderíen que les asume como propies. Amás, dende la organización de defensa del idioma piden a la SGAE «qu’analice les causes propies poles qu’estos premios nun resulten atractivos y nun se pierda en falacies y nel insultu fácil, descalificando y humildando públicamente a los creadores musicales nun idioma que yá sufre abondo, en cuenta d’impulsar esta actividá, lo que sería propio d’una institución qu’afirma promover y impulsar la calidá musical y la so diversidá».
15/05/2012 - El Festival Internacional de Cine dexa d'usar la forma «Xixón» nel logotipu
26/04/2012 - La Vuelta Ciclista a Asturies va usar la toponimia oficial
30/04/2012 - «Tenemos el retu de convencer a la sociedá de que l'asturianu paga la pena»
03/05/2012 - La XDLA llama a manifestase esti vienres 4 de mayu, Día de les Lletres Asturianes
17/05/2012 - Alfredo Álvarez presentó'l nomenclátor de la toponimia oficial d'Asturies
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
