Cultura

Victor Manuel y Héctor Braga van a actuar en Menorca'l Día d'Asturies

12/08/2010 a les 11:29:10

La viceconseyera de Seguridá y Emigración, Teresa Ordiz, presentó'l programa previstu pal Día d'Asturies nel Exterior, qu'esti añu va a ser en Mahón (Menorca) los díes 9 y 10 de setiembre. La celebración asturiana va coincidir coles fiestes locales y n'ella van a participar representantes del Gobiernu balear, el Consell de Menorca, el Centru Asturianu de Mahón y otros centros del estáu español. El 9 de setiembre nel stand del centru asturianu va a poder prebase la nuestra gastronomía y pela nueche, los estudiantes de baille y gaita de la Escuela d'Asturianía van a colaborar nun conciertu con Victor Manuel y Héctor Braga. El día siguiente van a ser los actos oficiales que van acabar con una espicha.

La programación, con dos de los asturianos de más nome fuera d'Asturies, contrasta cola prevista pal Día d'Asturies en Ribeseya onde los protagonistes van a ser grupos muncho más comerciales. De momentu, tan confirmaos Sergio Dalma, Chenoa, Isabel Pantoja, Rosa, Daniel Diges, Tamara, Soraya, Inocence, Mercadance (grupu de Nacho Cano) o l'ilusionista Mirko. Los asturianos que van participar na fiesta son, hasta agora, Lilián de Celis (cuplé), el Coro La Fuentina, l'Orfeón de Mieres, Pablo Moro (pop), Manolo Penayos (pop rock), la orquesta Dominó, Llacín (banda de gaites), Spanta la Xente (pop folk), Corquiéu (folk), y Xera (techno folk). Les actividaes van entamar el 4 de setiembre y durarán hasta'l día 8. «Organizamos un eventu de cinco díes de celebración que servirá pa fortalecer el gran motor económicu nel que ta convirtiéndose'l turismu», desplicaben dende la Conseyería de Cultura.

Dalgunos de los artistes contrataos van actuar n'Asturies dos veces en menos d'un mes. Ye'l casu del magu arxentinu Mirko –qu'el Festival Internacional de Maxa d'Asturies anunciara como actuación casi exclusiva nel estáu español– pal 21 d'agostu nel Polideportivu de Navia. Y ye'l casu de La Pantoja, que tamién va cantar esi día en Xixón, depués de que participara nel setiembre pasáu nes fiestes de San Mateo d'Uviéu. Esto y el caché de los grupos foriatos ta faciendo que dalgunos partíos nacionalistes se sienten molestos.

Andecha Astur, encamentaba al Principáu de forma irónica «a complementar tal esbardie d'asturianía con una corría de toros y un desfile de la Llexión Española». Pela so parte, el Bloque por Asturies declaraba que «nos provocca una profunda vergoña qu'esti Gobiernu recorte sueldos, ayudes y polítiques sociales, que calle la boca énte la paralización n'infraestructures, pero nun tenga nengún reparu en derrochar dineru na contratación d'artistes». Amás, anunciaba «vamos a preguntar a la señora conseyera cuánto cuesta a los ciudadanos esti Día d'Asturies, cuánto cuesta la programación, la gala y quién la diseñó», recordando que José Luís Moreno –que fai poco foi acusáu de sobornos al ex presidente del Gobierno balear– ye agora l'adxudicatariu de parte de la programación de la Llaboral. Y a la gala que la TPA va retrasmitir dende Ribeseya, tamién pa otres comunidaes autónomes. Dambos partíos pidieron la participación de la ciudadanía pa movilizase contra lo qu'Andecha calificó de «agresión a la nuestra identidá y cultura» el prósimu día 8 de setiembre.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam