Economía

CC OO y UXT convoquen una manifestación contra la reforma del sistema de pensiones

18/02/2010 a les 10:03:43

Acabar col fraude fiscal, actuar sobre la economía sumida, incidir nos ingresos en cuenta de nos gastos de la Seguridá Social... Éstes son delles de les propuestes que faen los sindicatos CC OO y UXT d’Asturies énte l’anunciu de reforma del sistema de pensiones que fixo’l Gobiernu español. Les dos centrales opunxéronse a esta iniciativa, que van contestar na cai con una manifestación. La cita, que quieren que sía «multitudinaria», en palabres d’Antonio Pino, secretariu xeneral de CC OO, ye a les 19 hores y sal de l’Avenida de Galicia d’Uviéu y va terminar nel Paséu los Álamos.

«Les propuestes del Gobiernu de xubir la edá de xubilación y d’ampliar el tiempu de cotización son inoportunes, inconvenientes y innecesaries», afirmó Pino en rueda de prensa, na que recordó que’l sistema de pensiones tien actualmente un beneficiu d’ocho mil millones d’euros. Igualmente, el líder de CC OO remarcó que l’Estáu español tien una media «formal» de xubilación, la de los 65 años, de les más altes d’Europa y ye’l segundu con una media «real», nos 63 años, más elevada. Justo Rodríguez Braga, secretariu xeneral d’UXT d’Asturies, coincidió con Pino nes crítiques al Gobiernu de Rodríguez Zapatero, al considerar qu’al Executivu «faltó-y tactu políticu y sobró-y oportunismu».

Al empar, les centrales sindicales incidieron en que primero d’abrir una reforma de les pensiones tán pendientes de cumplir dos puntos del Alcuerdu de Pensiones del 2006: integrar nel Réxime Xeneral el Réxime Especial Agrariu y el d’Empleaes Doméstiques, y rebaxar la edá de retiru de les persones que trabayen en condiciones llaborales penoses, tóxiques, peligroses o insalubres.

Nel mesmu sentíu, ún de los aspectos que criticaron duramente los sindicatos foi que s’actúe «na estructura del gastu y non na de los ingresos, lo que diba dar garantíes de verdá al sistema de pensiones», apuntó Pino. Dende UXT, Rodríguez Braga señaló la necesidá de reforzar la inversión pública «si lo que de verdá quieren ye crear empléu».

Les materies nes que, según los sindicatos, s’había trabayar p’ameyorar los ingresos son: acabar col 20 por cientu de la economía sumida qu’hai nel Estáu y col fraude fiscal; reformar la fiscalidá y actuar nos impuestos directos con un sistema progresivu; ameyorar el Salariu Mínimu Interprofesional hasta que llegue al 60 por cientu del salariu mediu pa facer medrar les cotizaciones; asitiar les pensiones mínimes penriba del tope de probeza; favorecer la xubilación flexible pa que la xente pueda escoyer ente anticipar o retrasar la edá de retirase y qu’ésta sía diferente según los sectores llaborales; ameyorar el modelu productivu pa que tola xente tenga un empléu de calidá, con derechos y con salarios suficientes pa que s’asegure la sostenibilidá del sistema de pensiones a llargu plazu; y debater sobre una estructura d’ingresos nueva que garantice la suficiencia financiera del sistema de Seguridá Social.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam