Sociedá

Uviéu acueye la esposición «La ciudá ensin barreres»

26/02/2010 a les 13:55:00

Dende'l 25 de febreru, y hasta'l próximu 11 de marzu, el Salón de Recepciones del Conceyu d'Uviéu acueye la esposición La ciudá ensin barreres, una muestra de fotografíes y un catálogu –n'asturianu y castellanu– sobre les barreres arquitectóniques y sociales que sufren día a día les persones discapacitaes.

Esta iniciativa ta enmarcada dientro d'un proyectu más ampliu, Promoción d'Asociacionismu con Xóvenes con Discapacidá, entamáu pol Conseyu nel 2008 con un oxetivu claru: el de promocionar l'asociacionismu ente tola mocedá.

Esti trabayu tien dos vertientes, una de trabayu cola mocedá discapacitao y otra de creación de materiales que valgan de guía a les asociaciones xuveniles. Amás, cola idea de reflexar los pensamientos y reflexones de los y les moces con discapacidá, les fotografíes van acompañaes de testimonios reales.

Con esti formatu, los responsables del proyectu busquen «visibilizar» delles de les dificultaes que les persones con discapacidá alcuentren na so vida cotidiana y les sensaciones y les reflexones que s'orixinen énte estes situaciones.

Ente los responsables de la iniciativa tán el presidente del Conseyu de la Mocedá del Principáu d'Asturies, Paulino Feito, y, pol Conseyu de la Mocedá d'Uviéu, Lisi Sarcida, Ula Jusianiec y Lorena Miranda. Amás, les fotografíes fíxoles l'asociación Llaboratoriu d'Ágora. De toles maneres, los auténticos protagonostes foron los mozos y moces qu'aparecen nes fotografíes y que, amás, ponen los sos testimonios.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam