Asturies

Unión Asturianista culpa a los partíos «centralistes» de los problemes d’Asturies

09/09/2010 a les 10:30:30

Unión Asturianista, coalición formada pol PAS y la URAS, celebró en Candás el miércoles 8 de setiembre, Día d’Asturies. La formación centró’l discursu nel progresu d’Asturies, culpando a los partíos «centralistes» de la situación de crisis.

Dende primer hora de la mañana una carpa del PAS instalada nel centru de la villa candasina valió pa dar a conocer el mensaxe y les propuestes de la coalición. La organización repartió folletos informativos y recoyó la opinión de les persones que quixeron mostrar les sos esmoliciones, dientro de la campaña del PAS Y tu, ¿qué opines? Nos actos participaron más de doscientes persones, según informen dende la organización.

A la una y media la tarde principió l’actu políticu cola intervención del representante local d’Unión Asturianista en Carreño. Depués intervieno Javier López, presidente d’Unión Renovadora Asturiana, que recordó que los problemes xenerales afecten más n’Asturies «pola mala xestión de los partíos centralistes».

Xuan Xosé Sánchez Vicente, presidente del Partíu Asturianista, peslló les intervenciones del Día de la Nación con un discursu nel que recordó la llarga historia d’Asturies; «única, xunto a Cantabria, con un nome diferenciáu cuando aportaron a la Península los romanos».

Sánchez Vicente recordó les «ansies» d’Unión Asturianista pol progresu d’Asturies. Progresu que pal líder del PAS nun vien «pol mal facer del PSOE y el pasotismu del PP, que desprecien a Asturies y tán a ver qué-yos manden facer dende Madrid».

Los militantes del PAS y la URAS percorrieron depués les cais de Candás hasta’l Monumentu a la Mar y a la Mina, onde se fixo un homenaxe a los trabayadores asturianos «nun momentu de crisis tan dura como esta»

Nun local del conceyu celebróse depués una comida pa militantes onde tamién tuvieron presentes miembros de Xuventú Asturianista y Mariu Arbesú, Secretariu d’Organización d’Andecha Astur, en representación del so partíu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam