Asturies

UNA propón la creación d’un «espaciu políticu asturianu»

25/02/2010 a les 14:06:13

Unidá Nacionalista Asturiana (UNA) va facer el so congresu nacional ente los díes 6 y 7 de marzu. Una de les propuestes más novedoses qu'incorpora la ponencia marcu d'esta organización nacionalista d’esquierdes, si ye finalmente ratificada pola militancia nel congresu mentáu, ye l'oxetivu de construcción d'un Espaciu Políticu Asturianu que «recupere'l nacionalismu como un referente social claru y como una voz que nun pueda tar ausente de cualesquier debate importante pal nuesu país».

Según el testu de la ponencia, «ye necesario que l’asturianismu políticu tenga presencia institucional, con conceyales, diputaos y diputaes nes instituciones asturianes, y que éstos seyan a influyir nes polítiques que se desenvuelven n’Asturies y nello hai que trabayar cola vista puesta nes elecciones del 2011». UNA propón nesti sen l'articulación del Espaciu Políticu Asturianu como una alternativa de país en clave asturiana al proyectu del PP y PSOE-IU, que «comparten la so subordinación a un proyectu políticu non pensáu dende y p’Asturies y la so coincidencia nel modelu cultural, social y ecolóxicu».

La propuesta d’UNA básase na construcción d’una ufierta a la sociedá asturiana alternativa a la crisis «del modelu compartíu pol PSOE y el PP, autocentrada nes prioridaes y necesidaes d’Asturies, moderna y imaxinativa, que seya a meyorar la calidá de vida, la igualdá y l’autonomía de la mayoría social, rompedora col réxime de bipartidismu de fechu al introducir un tercer elementu que seya a triangular la política asturiana, qu'ufierte un discursu en positivo que se perciba como una opción de progresu social, amplia, que nun acabe n’UNA, autónoma respective a los discursos del PSOE-IU y PP, desbordadora de les actuales posibilidaes sociales y electorales del nacionalismu políticu organizáu, atropadora de les distintes sensibilidaes del nacionalismu asturianu y del asturianismu, ganando principalmente la confianza de les más de les persones que nun militen en nenguna organización y demanden yá una alternativa seria y innovadora pa ser a modernizar y da-y forma al proyectu que la sociedá entienda como una propuesta moderna capaz de meyorar la so calidá de vida».

L'Espaciu Políticu Asturianu ye na ponencia marcu UNA l'apueste estratéxicu más importante de la organización, «una necesidá imperiosa como espresión d’un espaciu políticu non sucursalista, referencial na sociedá asturiana, aglutinador de lo meyor de les tradiciones del nacionalismu asturianu, del ecoloxismu políticu y de la esquierda tresformadora, que tendrán que definir con flesibilidá y xenerosidá los actores que con UNA quieran sumar fuerces nesti proyectu».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam