Actualidá

UNA pide al gobiernu de PSOE ya IX que pare l'ataque a la sanidá y educación pública»

04/09/2010 a les 11:05:06

El portavoz d’UNA, Faustino Zapico, treslladó la esmolición énte «l'ataque que ta llevando alantre'l Gobiernu asturianu contra'l sistema sanitariu y educativu públicu». Zapico cuida qu'hai munches partíes presupuestaries susceptibles de ser recortaes, «enantes que tocar esta triba de gastos, básicos pa caltener un mínimu estáu del bienestar».

Pal voceru d'UNA, «el recorte del númberu d'interinos y los planes de reforma de la sanidá pública son la muestra inequívoca de la pésima xestión del Gobiernu». Dende UNA esixen el fin de «la política d'ataques constantes contra l'estáu de bienestar y, sobre manera, contra dos de los sos pegoyos como son la educación y la sanidá pública».

Faustino Zapico al respective de la eliminación de 668 interinos indicó que «siguimos ensin encarar el problema d'un sistema dual, onde l'Estáu paga sistemes educativos privaos a cuenta d'amenorgar el númberu d'alumnos de la educación pública, llegando al absurdu de tener instalaciones educatives infrautilizaes, mentes se sigue pagando a entidaes privaes una educación que podría asumir el sistema públicu».

El portavoz d’UNA afirmó qu’asina ta «eliminándose adulces» el sistema d'educación públicu.Pela so parte, l'ataque contra la sanidá pública «yá vien dende'l fin de la negociación del financiamientu autonómicu, cuando'l Conseyeru de sanidá Ramón Quirós, faló del copagamientu y depués tuvo que rectificar pola alarma social xenerada».

Amás, señaló que «les midíes d'agrupación de zones sanitaries, volverán marxinar les zones menos poblaes d'Asturies, creando un incentivu más p'abandonales a favor de los núcleos urbanos, lo que conderga a la desapaición del mundu rural a mediu plazu” indicó Zapico.

Pal portavoz d’UNA hai partíes presupuestaries que podríen recortase y «inclusive sería deseable recortar, como ye'l gastu de la TPA polos derechos de la Fórmula 1 o del fútbol que s'emiten n'abiertu n'otres cadenes” y tamién “desaniciar tol sistema d'alministración paralelu».

Faustino Zapico consideró irónicu que «la mesma Alministración a la que-y anulen por decisión xudicial la escoyeta de más de 200 cargos puestos a deu, sía quien a dicir que se precisa recortar personal público básico pa garantizar la calidá de los servicios públicos», concluyó Faustino Zapico.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam