Les Noticies.com. Diariu dixital. 17-05-2012
UNA y Bloque por Asturies van presentase otra vez xuntos
REDACCIÓN. UVIÉU - 08/02/2012 A LES 13:54:36Los órganos representativos d'Unidá Nacionalista Asturiana (UNA) y Bloque por Asturies alcordaron repetir la coalición electoral cola que concurrieron xuntos a les elecciones de mayu del 2011 y aplazar hasta depués de la convocatoria electoral el procesu de confluencia col que quieren incorporar persones y sensibilidaes nueves.
Les dos formaciones entienden que ye menester qu'haya «una alternativa en clave asturianista, d'esquierdes y ecoloxista que defenda ensin medies tintes los intereses de la mayoría social y del país, que cuente colos movimientos sociales, que tenga un proyectu p'Asturies non sucursalista y que tenga como meta la defensa de los intereses de la mayoría».
La situación política d'Asturies, según manifiesten, «pon n'evidencia'l nulu respetu que les fuercies parllamentaries asturianes tienen pola ciudadanía que representen, colo que quedó afitada la fuesa existente ente esta y los partíos políticos parllamentarios». Bloque-UNA destaca'l fechu de qu'en mediu d'esta crisis que sufre Asturies «nos conderguen a la ingobernabilidá y al costu económicu que supon unes nueves elecciones».
Pa la coalición, el 25 de marzu hai «una oportunidá d'oru pa espresar el refugu a les polítiques d'axuste antisociales de los distintos gobiernos asturianos, enantes PSOE-IU, agora FAC» y «pa castigar a quien anteponen los intereses partidistes a los d'Asturies».
Al respective de la posibilidá d'ampliar la coalición nesta convocatoria electoral a más formaciones, «una opción propuesta» –espliquen– «nos órganos de dambes organizaciones y reclamada nos últimos díes dende distintos sectores», dende Bloque por Asturies y UNA «realizáronse distintos contactos nos últimos díes que nun fructificaron ante la imposibilidá d'una negociación por, ente otres razones, la premura de tiempu cola que se realizó la convocatoria electoral». Nesti sentíu, comprométense a siguir trabayando «por una alternativa lo más amplia posible ensin les prieses electorales depués del 22 de marzu».
Sofitu a la manifestación de Xixón
Manuel Benayas, coportavoz de Bloque-UNA, treslladó'l sofitu de la coalición a la manifestación convocada pa esti xueves 9 de febreru en Xixón polos sindicatos CSI, CGT y Suatea.
Dende Bloque-UNA consideren necesario que «l'actual Gobiernu de Rajoy sepa de primer mano l'actitú de los trabayadores ante los planes de recorte de derechos que se tán anunciando dende les files del PP». Benayas dixo de la manifestación que yera «necesaria pa salir de l'actitú acrítica hacia una política económica que carga los costos nos que sufren la crisis y que premia a los que la xeneraron, como'l mesmu Ministru d'Economía, responsable en Lehman Brothers, ún de los principales causantes de la crisis financiera qu'esplica la nuestra situación actual».
Pa Bloque-UNA ye importante destacar el lema de la manifestación –Esto nun ye una crisis, esto ye una estafa–, porque «esta crisis ye una estafa»: «Recorta a los trabayadores, pero los fondos pa les entidaes bancaries nunca son abondo anque estes nun abran el grifu del creitu», esplica Benayas. La coalición nacionalista anima a la ciudadanía a participar na manifestación «como un pasu pa entamar la respuesta contra les agresiones a los derechos de los trabayadores».
Comentarios fechos (9)
Falo 10/02/2012 a les 13:15:31
Que bien falesti, Forquéu. Ya tarrecen toos estos negativistes que vienen a dicir que l'asturianismu nun tien futuru, que ye una ruina, que nun va sacar nada, etc... y al final piden el votu pal españolista furiosu de Cascos. Eso si que ye incoherencia supina. FAC ye tan españolista que los "asturianistes" que fueron con ellos dexaron de falar asturiano y escaecieron la cultura nacional. A eso llegase. Si se ye nacionaliegu hai que votar nacionaliegu, si somos pocos pues a procurar ser más. Si lo que se quier ye "utilidá" como diz dalgún, yo recomiendo-y falar n'inglés o emigrar a Suiza.
Ánxel 09/02/2012 a les 19:50:02
Depués de munchos años de fracasos, dixebres y escisiones, parez que l'asturianismu políticu entama a facer bien les coses. La reedición de la coalición ente'l Bloque y la UNA pa esti 25 de marzu ye una bona noticia. Ésto nos bien a dicir que'l procesu qu'entamaron hai un añu va pol buen camín, y que los pasos que van dando anque nun seyan tolo rápido que dalgunes quisiéremos tan bien afitaos.
En solo un añu se fixo mas qu’en dos décades. Xuntáronse dos organizaciones asturianistes, qu’anque se movieren nun terrén ideolóxicu similar, proveníen de cultures polítiques mui diferentes.
Felicito a les dos organizaciones porque tan demostrando que con confianza, xenerosidá y llealtá ye posible la unidá.
Forqueu 09/02/2012 a les 16:38:58
Yo abluco cola xente. O sea que somos nacionaliegos y nun votamos nacionaliego!!!!! Entos con que derechu podemos tar tol dia berrando que nun tenemos representacion parllamentaria y que nun tenemos un partiu nacionaliegu si nun votamos lo qu'hai y si lo facemos ye pa da-y el votu al que nos quier esterminar etnicamente? Nun lo entiendo.
En terminos futbolísticos podria ser como animar al equipu contrariu a que meta gol porque total el nuestru seguro que nun marca?? Absurdo.
Claro que nos prestaria tener un partiu fuerte, pero hai que trabayalu o polo menos sofitar a aquellos que nun ganando na como los ppsoe dan el so tiempu pa qu'algun dia tengamos lo qu'arranamos.
Trabayar en serio 09/02/2012 a les 09:44:23
Mariu, BA-UNA subio 2.000 votos. En lenguaje andechés, subió más votos BA-UNA que los que sacó Conceyu Abiertu. Asina, como vamos a construir ná, esta xente ye feliz gobernando la FSA y llorando por los chigres.
Trabayar en serio 09/02/2012 a les 09:41:56
Hai xente que valora más el facer una carta y charrar por los chigres, que el trabayu de añu y medio de dos organizaciones. Ye increible que los que nunca se xunten con naide, decidan los tiempos de nacionalismu asturianu.
Los memos que lleven 30 años destrozando el nacionalismu, siguen sin colar pa pasa y faciendo política de chigre, despreciando el trabayu de los sos compañeros.
La carta de doce nacionalistes, donde atopense verdaderos dinamitadores de procesos anteriores de xuntanza, ye una bomba de reloxería más nel únicu precesu serio a día de güei pa crear un polo asturianista d'izquierdes, y el únicu enfotu que tien ye meter el agua en casa a la xente que trabaya serio.
04/05/2012 - 2.000 persones piden nes cais d'Uviéu la oficialidá del asturianu
07/05/2012 - Naz el procesu «Compromisu» de la mano de la fusión de Bloque por Asturies y UNA
08/05/2012 - Herbamora presenta'l 9 de mayu n'Uviéu'l so proyectu musical nuevu
20/04/2012 - IX quier que'l PSOE se comprometa a instaurar la circunscripción única
15/05/2012 - Compromisu constitúise nel Nalón
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
