Asturies

UNA y Bloque aseguren que nel 8-S «ábrese una puerta a la esperanza»

07/09/2010 a les 09:56:07

Faustino Zapico, portavoz d'UNA, y Rafael Palacios, miembru de la Dirección Nacional del Bloque por Asturies, fixeron una rueda de prensa pa presentar el so apoyu a la Plataforma Unitarial 8 de setiembre y a la concentración que se va celebrar esi mesmu día a les 12.30 hores nos Xardinos del Náuticu de Xixón.

Nesta rueda de prensa les dos organizaciones espresaron la so voluntá d'abrir un procesu de rexeneración democrática «qu'airee la política d'Asturies énte esta situación llamentable que vive'l país» y aseguraron qu'a partir d'agora «ábrese una puerta nueva a la esperanza y esperamos qu'esti día sía'l primeru d'un futuru nuevu y alternativu».

Según el portavoz d'UNA, esta fecha «ye una bona xornada pa empezar a reivindicar qu'otra Asturies ye posible». Zapico señaló que la respuesta política «nun pue quedar namás nel 8 de setiembre, porque depués va venir el 9 y hai que siguir trabayando». Amás, criticó que les fuerces polítiques actuales «nun son parte de la solución que necesita Asturies, sinón que son, precisamente, parte del problema d'esti país».

Pela so parte, Palacios reafirmó les palabres de Zapico y añadió qu'esta xornada «tien que valir pa dar una respuesta a esa realidá que nos tán vendiendo día a día y que nun ye la que queremos p'Asturies». Palacios, amás, recalcó la importancia «de dar una respuesta unitaria».

D'otru llau, tanto UNA como Bloque por Asturies aprovecharon pa facer un llamáu a la movilización «de la esquierda, del asturianismu, del ecoloxismu y de tolos ciudadanos en xeneral, pa dar una respuesta na cai».

Otra manera, la Plataforma Unitaria 8 de Setiembre presentó los actos oficiales que se van desarrollar en Xixón por cuenta del Día d'Asturies. Éstos van entamar a les 12.30 hores nos Xardinos del Nauticu (Xixón) y van tar conducíos pol actor asturianu Toño Caamaño y van participar representantes de dellos colectivos asturianos que van poner la so voz a les problemátiques sociales, ecolóxiques, culturales y llingüístiques que vive Asturies. Asina, va poder contase cola presencia de Javier Orozco, refuxáu políticu colombianu residente n'Asturies, o l'actor José Antonio Lobato.

Según anunció la plataforma, p'abrir y ciarrar l'actu va contase cola intervención del gaiteru Llorián García Florez, amás de les actuaciones de la cantante de tonada Mari Luz Cristóbal, ente otros. La organización esplicó qu'estes actuaciones musicales «van valir de contrapuntu a les celebraciones "oficiales" previstes pol Gobiernu asturianu en Ribeseya». P'acabar colos actos, va lleese un manifiestu consensuáu poles organizaciones que componen la plataforma, dende onde se recalca «la necesidá de crear espacios políticos nuevos pa empezar el ciclu nuevu que representa esti actu unitariu».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam