Llingua

EL TSXA entiende que la Llingua Asturiana tien que tar presente na Educación Infantil

27/04/2010 a les 15:08:38

La presencia de la Llingua Asturiana na Educación Infantil ye una de les principales llagunes existentes na escolarización del Asturianu. Asina lo pon de manifiestu SUATEA, qu'a primeros del 2009 presentó un recursu contra'l currículum d'esta etapa, publicáu nel 2008, al entender que se vulneraba l'artículu 10 de la Llei d'Usu onde se diz que «se va garantizar la enseñanza del bable/asturianu en tolos niveles y graos, respetando sicasí, la voluntariedá del so aprendimientu. En tou casu, el bable/asturianu va tener que ser impartío dientro del horariu escolar y va ser considerao como materia integrante del currículu». El Tribunal Superior de Xusticia d'Asturies (TSXA) nun valoró que s'incumpliera esti artículu, al interpretar que la presencia de la Llingua Asturiana taba incluída nos conteníos de Cultura Asturiana –que sí ta nel Currículum– «porque la mesma constitúi una manifestación cultural al respective».

SUATEA dio a conocer el resultáu de la sentencia y afirmó que, acordies cola resolución, l'Alministración había dar respuesta a l'ausencia efectiva de la llingua asturiana qu'hai nesta etapa: «Educación tien abandonada la presencia de la llingua asturiana n'Infantil dende va años», señala Xosé Lluis Colodrón, miembru del sindicatu SUATEA, en declaraciones a LES NOTICIES. «Tenemos noticia de centros que quixeron enanchar la ufierta de Llingua Asturiana a Infantil, solicitáronlo a la Conseyería d'Educación y negáron-yos la demanda argumentando que nel currículum d'Infantil nun aparez nenguna mención a la llingua asturiana; sicasí, según esta sentencia, había garantizase esa presencia del asturianu», comenta Colodrón.

Hasta agora, según les cifres de SUATEA, namás el 13% del alumnáu recibe enseñanza de Llingua Asturiana, mentes qu'en Primaria les matriculaciones xuben hasta'l 55%, dalgo que-y choca a la central «porque cuasi tol alumnáu d'Infantil ta integráu nos centros de Primaria col mesmu equipu directivu que xestiona la elección d'estos conteníos», señálase en nota de prensa.

Otra manera, el sindicatu denuncia que l'Alministración «nun fixo nenguna campaña informativa del derechu a recibir enseñanza en Llingua Asturiana o Gallego-Asturianu na Educación Infantil, nin mandó nenguna circular o instrucción a los centros informando del procedimientu pa materializar el derechu de los padres y madres a escoyer la formación llingüística pa los sos fíos y fíes».

Nesti sen, les demandes de SUATEA son: una ufierta xeneralizada de la enseñanza de Llingua Asturiana o Gallego-Asturianu na Educación Infantil; les disposiciones reglamentaries qu'amuesen a les clares los conteníos, midíes organizatives y recursos materiales y humanos que se van dedicar a la enseñanza de Llingua Asturiana o Gallego-Asturianu na Educación Infantil; la puesta en marcha de planes de formación del profesoráu d’Infantil en Llingua Asturiana y Gallego-Asturianu na formación permanente; la collaboración cola Universidá pa que nos planes d'estudiu universitarios nuevos se cree la Mención de Llingua Asturiana nel Grau de Maestru/a d’Educación Infantil; valoración y reconocimientu de la especialidá nel nuestru idioma nel accesu al puestu de trabayu por ella y nos concursos de tresllaos, oposiciones y llistes d'interinidá de toles otres especialidaes; y la previsión del aumentu de puestos d'especialistes de Llingua nos cuadros de personal del 2010.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam