Actualidá

El Tribunal Internacional de Xusticia reconoz la independencia de Kosovo

23/07/2010 a les 12:56:36

La independencia unilateral de Kosovo nun infrinxe nenguna llei internacional y tien l’aval, dende’l 22 de xunetu, del Tribunal Internacional de Xusticia, el máximu órganu xurídicu de les Naciones Uníes. Les reacciones a la sentencia del tribunal internacional nun se fixeron esperar y, bien llueu, los Estaos Uníos y la Unión Europea reiteraron un apoyu absolutu al xoven Estáu balcánicu. España y Rusia caltienen, con too y con eso, la negativa a la reconocencia y arímense a les demandes de Serbia.

El tribunal dexó claro que nun atopaba nengún argumentu na llexislación internacional que prohibiera la independencia d’un país. «El tribunal considera que la llei internacional nun contién prohibición nenguna aplicable sobre la declaración d'independencia», dixo’l presidente, el xuez Hisashi Owada, na aclaración de la resolución xudicial. «En consecuencia, coincidimos en dicir que la declaración d'independencia del 17 de febreru del 2008, nun viola la llei internacional».

España y Rusia mantienen la negativa a reconocer la independencia de Kosovo. Nesti sen, l’Estáu español aseguró que respetaba la decisión del Tribunal Internacional de Xusticia y que compartía la opinión de la Unión Europea, que considera qu’a partir d’agora «ábrese una etapa nueva y ye’l momentu de mirar dica’l futuru»; así qu’así, espresóse que se mantenía na negativa de reconocer la independencia de Kosovo. Fontes del ministeriu d'Asuntos Esterires confirmaron que’l Gobiernu español yera partidariu «d'abrir la perspectiva europea pa tolos Balcanes» y que, na llinia de la declaración europea, el futuru de Kosovo y de Serbia yera formar parte de la UE».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam