El tramu de l'A-8 abiertu esti sábadu nun respeta la llegalidá toponímica

El trechu de l'Autovía del Cantábricu (A-8) de cuasi doce quilómetros que s'abrió esti sábadu 4 de febreru ente Torce (Cuaña) y Mántaras (Tapia) incumple la llegalidá en materia toponímica, afirma l'asociación cultural Xeira. Tanto nos lletreros qu'hai a lo llargo de la vía como nos desvíos d'accesu y salida a ella figura'l topónimu La Caridad, cuando dende hai siete años el topónimu oficial ye A Caridá. Según el Decretu 31/2005 pol que se determinen los topónimos oficiales del conceyu d'El Franco, la capital tien como única denominación A Caridá. «Y esto ye llei dende que s'aprobó en Conseyu de Gobiernu y se publicó nel Boletín Oficial del Principáu d'Asturies el 6 de mayu del 2005», aclaria Xeira.

El tramu de l'A-8 abiertu esti sábadu (qu'enllaza los dos yá abiertos dende La Polavieya hasta Torce y el que va dende Barres camín de Galicia per Ribadeo) va en parte pel conceyu d'El Franco, que ye l'únicu d'esa zona que tien aprobada yá la toponimia tradicional. D'ehí qu'apareza'l nome de la capital del conceyu bien de veces nos lletreros.

La entrada en vigor de les formes toponímiques oficiales suponía una adaptación progresiva en toles señalizaciones y, por descontao, nes nueves. Xeira esplica qu'en declaraciones repetíes polos responsables anteriores y actuales de la Dirección Xeneral de Política Llingüística anuncióse que se taba trabayando pa que les formes toponímiques non solo se respetaren en víes de titularidá autonómica sinón tamién nes del Estáu. «Polo que se ve, nel casu de l'Autovía del Cantábricu al so pasu pel occidente asturianu, nun dieron nengún resultáu», denuncia Xeira.

Xeira pide a la Dirección Xeneral de Política Llingüística y al Delegáu del Gobiernu que medien pa que se respete la llegalidá «y se reconoza na señalización viaria un patrimoniu como'l nome tradicional de los nuestros llugares al que por fin-y dieren l'apreciu que merecía». «Les lleis tán pa cumpliles y nun hai nenguna xustificación pa que les autoridaes desconozan una realidá que ye oficial dende hai siete años», conclúi l'asociación del occidente asturianu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam