Sociedá

TPA estrena'l programa n'asturianu «Mirasturies»

22/07/2010 a les 11:33:04

La Televisión del Principáu d’Asturies (TPA) acaba d’estrenar el programa Mirasturies, el pasáu recién, una serie de documentales n’asturianu que van recorrer la historia, el territoriu, la naturaleza, l’arte y les tradiciones del país en 50 capítulos. L’espaciu emítese a los llunes y vienres a les 9.30 hores.

Con Mirasturies, TPA aumenta en media hora'l tiempu que dedica a la programación n’asturianu y, en palabres de la propia canal autonómica, «refuerza’l so compromisu cola difusión de la llingua y la cultura asturianes, que l’Ente de Comunicación del Principáu tamién fomenta na programación de RPA y nel conteníu del periódicu dixital».

La serie qu’estrena TPA esti branu va repasar en 50 capítulos la historia asturiana en títulos como «Asturies, crónica d’un sieglu» y «Tal como yéramos» y muestra la flora y fauna del país n’«Árboles y viesques d’Asturies», «Fauna d’Asturies, de los cumales al monte» y «L’osu pardu», ente otros. Mirasturies tamién va atender tanto pal patrimoniu histórico-artísticu –«La puerta del cielu», «El Románicu n’Asturies», «Catedral d’Uviéu» y «Arte Góticu»– como pa la cultura popular y les tradiciones –colos capítulos dedicaos a «Ferramientes tradicionales», «La forxa del metal» y los «Mercaos Tradicionales»–. Tampoco nun va faltar un percorríu pel territoriu del país, con episodios como «Cares, la divina garganta», «Un paséu per Uviéu» y «Les rutes de Les Xanes y del Navia». La gastronomía y los deportes tradicionales, como los bolos, tamién van tener sitiu en Mirasturies.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam