Economía

Telefónica podría echar al 35,2% de los sos trabayadores n'Asturies

HÉCTOR M. PALACIO . UVIÉU - 27/05/2011 A LES 11:11:36

De los 568 trabayadores que tien Telefónica n'Asturies, 200 van vese afectaos pol espediente de regulación d'empléu (ERE), lo que supón el 35,2% del personal. Esti ye'l cálculu que faen los sindicatos UXT y CC OO, anque la cifra final d'afectaos va depender de cuántos trabayadores s'acueyan al ERE, que ye voluntariu, y de la edá de salida que diga Telefónica. A nivel estatal, la compañía de telefonía tien pensao reducir 8.500 empleos nel área de telefonía fixa de la so filial española nos próximos cinco años, en cuenta de los 5.600 puestos de trabayu que pensó nun primer momentu.

El Gobiernu quier esixir que sía Telefónica la qu'asuma los costos de les prestaciones por desempléu de los despidíos, porque nun son paraos convencionales, aspirantes a otru puestu de trabayu, sinón que van directamente a la xubilación. Hasta agora, los prexubilaos nos ERE de cuasi toles empreses, menos la banca, cobraben los dos primeros años la prestación del Sistema Públicu d'Empléu, de manera qu'esi importe venía de fondos públicos.

La multinacional xustifica esti ERE por una causa económica, fundamentalmente, anque tamién por otres organizatives, tecnolóxiques y de producción. Hai que recordar que Telefónica ganó 10.167 millones d'euros en tol mundu nel 2010, un 31% más que l'añu anterior y que, per otra parte, aprobó un plan de 450 millones d'euros n'acciones pa 1.900 directivos. El so presidente, César Alierta, cobró 8,6 millones l'añu pasáu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam