Les Noticies.com. Diariu dixital. 17-05-2012
La sustitución de Cienfuegos por Carballo abre la polémica nel FICXixón
REDACCIÓN. UVIÉU - 12/01/2012 A LES 11:44:36El Festival de Cine de Xixón (FICXixón) tien director nuevu. El conceyal de Cultura del consistoriu xixonés, Carlos Rubiera, facía pública la destitución del responsable actual, José Luis Cienfuegos, y al empar daba a conocer el nome del que lu va sustituír: el cineasta Nacho Carballo.
Desque se conoció la destitución de Cienfuegos, les redes sociales yeren un fervedoriu de crítiques pola decisión del responsable de Cultura del Conceyu de Xixón. Y ye que la decisión tómase cuando’l festival cinematográficu ta a puntu de cumplir el mediu sieglu y les crítiques a la dirección del festival son mui positives. Hasta la fecha, dende'l Conceyu de Xixón nun s'esplicaron los motivos del cese de Cienfuegos, que llevaba nel cargu 16 años.
Otra manera, al pie de Carballo van trabayar Jorge Iván Argiz –vinculáu a la Selmana Negra–, que va tener el cargu de subdirector y coordinador del FICXixón; Jaime Vega, que va ser el xerente nuevu y alministrador; y Jesús Parrondo, que se va encargar de coordinar delles actividaes y los talleres que se programen nos centros municipales.
Na so comparecencia, Carballo manifestó que nun van romper «col estilu independiente y alternativu del festival, sinón que lu vamos potenciar y abrilu a secciones y temátiques nueves». El responsable nuevu del FICXixón aseguró qu'al traviés d'esti festival va haber la máxima de «potenciar Asturies». «En Sitges nun s'avergüencen por celebrar el Día de Cataluña y, anque nos llamen aldeanos, quiero más eso y que me critiquen por poner la montera picona y trabayar pola mio tierra a que sigan riéndose y dándonos llecciones de moral», declaró Carballo, al tiempu qu'anunciaba la creación de la I Gala d'Asturies na 50 edición del FICXixón.
Pela so parte, y según recueye'l diariu El País, José Luis Cienfuegos nun va facer nengún tipu de declaración y va convocar una rueda de prensa nos próximos díes na que va presentar el balance de cifres de la so xestión.
Comentarios fechos (12)
Falo 17/01/2012 a les 23:51:57
Callastis como afogaos. Prestariame saber si dalgún tuvo unos... y mando-yos un mail a esa xente pa ponelos nel so sitiu, o si pel contrariu sólo sois borrachucios glayando en chigre.
Falo 15/01/2012 a les 13:52:43
Pues lo que hai que facer ye manda-y una carta a Jesús Iglesias y nun glayar al aire. La dirección de mail ye: infoiu@izquierdaxunida.com y la mio carta diz esto:
Estimáu Jesús:
L'otru día fixistime pasar vergüeña ayena y toi camentando nun votavos na vida. Desplicome: tabes falando del asunto del FICX en perfeutu castiellán y na más nomar les madreñes entós tornasti al asturiano. ¿Qué tas promocionando l'aldeanismu del asturianu? ¿Ye esi el sentir que ties de la nuesa llingua? Hai veces que ensin danos cunta amosamos lo que somos. Siento vergüeña de ti, tenía otru conceutu tuyu. Debieras como mínimu disculpate públicamente ya que públicamente punxisti la nuesa llingua d'aldeana, de risible y cómica. Sólo te faltó falar de cuchu y vaques pa amosar tolos tópicos del pequeñuburguesismu más ranciu y retrogradu n'esti aspeutu.
Sin más. Un atentu saludu y espero que sepas correxite.
Nuberu 13/01/2012 a les 21:16:47
A Izquierda Unida pasa-yos como diz el refran:¨Dime con quien andes y te dire quien yes¨.Tantu tiempu pegadinos al PSOE nel poder n´Asturies que pegose-yos lo d´insultar a la llingua asturiana hasta´l puntu que utilicen hasta les mesmes pallabres.Ya nun-yos basta nun facer nada por esta llingua como demostraron y reconocieron ellos mesmos nel tiempu que gobernaron.Tamos avezaos a que Jesus Iglesias y los sos amiguinos d´IU (lo d´¨Izquierda Xunida¨ ye otra tomadura pelu d´esta xente por qu´enxamas lo pronuncien solu pa poner nos carteles) se llenen la boca diciendu defender l´asturianu,aunque nunca la utilizan,y pa una vegada que lo fai ye pa despreciala...la pena ye que siguen engañando al personal y hay xente que traga.
más madreña 13/01/2012 a les 13:25:01
Más madreñes. Jesús Iglesias, nuna rueda de prensa esta mañana, opinando de la movida de FIX Xixón: ta falando en castellano y, nesto, saca l'asuntu de les madreñes. Entós cambia y ponse a falar n'asturiano. Diz que les madreñes tán mui bien pero que nun les hai que poner na cabeza. Dizlo poles decisiones de Carlos Rubiera. Claro, si yes asturianista la identificación ye clara: asturianismu = bable = madreñes.
llector 13/01/2012 a les 11:28:27
Los datos d"un" son evidentes. Toi d'alcuerdu neso. Pero, dicho esto, yo toi viendo un tafu a antiasturianismu tópicu que nun me presta gotera. Güei, en LNE, diz Carmen Veiga (PSOE), ex-xerente del Xovellanos, de Rubiera: "Solo falta que levante los adoquines para que pisemos la hierba con madreñes". Ye como cuando lo del Niemeyer, que falaben sacaben lo de la madreña contraponiéndolo a l'alta cultura.
Lesnoticies.com - La sustitución de Cienfuegos por Carballo abre la polémica nel FICXixón
José Luis Cienfuegos, ex-director del FICXixón
11/05/2012 - La Xunta de Toponimia acepta «Guimarán»
25/04/2012 - L’Asociación d’Escritores d’Asturies nun contempla l’asturianu nos XIII Premios de la Crítica
12/05/2012 - Asturies arrasa A Baixa lisboeta
26/04/2012 - Carlos Suari vuelve'l Premiu de la Crítica 2009 pola decisión de retirar les categoríes n'asturianu
14/05/2012 - LESNOTICIES.COM ufierta una galería colos meyores momentos del Festival de la Mázcara Ibérica
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
