Llingua

Suatea pide nel 8-S una meyora de la situación del asturianu na enseñanza

07/09/2010 a les 13:38:08

El sindicatu educativu Suatea vien de facer una valoración del sector por cuenta del Día d’Asturies, amás de pidir la oficialidá y la meyora de la situación de la llingua na enseñanza. Tamién fai un llamáu a la sociedá y a la comunidá educativa pa participar na concentración convocada pola Plataforma Unitaria 8 de Setiembre.

Suatea quier aprovechar el Día d’Asturies pa pidir el caltenimientu del sector y de los servicios públicos, amás d'esixir salarios y pensiones dignes pa tolos trabayadores.

Sobre la situación llingüística del país piden la oficialidá del asturianu y del gallego-asturianu, «como única ferramienta llegal que garantiza’l respetu efectivu de los derechos llingüísticos y favorez la sobrevivencia de la nuesa llingua y cultura».

Pal profesoráu piden que les places d’asturianu y gallego-asturianu pasen a formar parte de les plantiyes orgániques de los centros, la creación de la especialidá y la convocatoria d’oposiciones.

El sindicatu quier que’l curriculu d'Educación Infantil recueya l’idioma del país «y que demientres nun lo faga s’atiendan toles demandes d’escolarización nesta etapa fundamental pal deprendimientu en xeneral y el llingüísticu en particular».

Tamién piden que nos centros s’igüen planes llingüísticos que dean un tratamientu integráu y coordináu de toles llingües que s’enseñen «y onde la nuestra llingua sía vehicular en delles árees».

Suatea fai una crítica a la celebración institucional del Día d’Asturies en Ribeseya, a la que califiquen de «charanga y pandereta». El sindicatu afirma que se trata d’una situación de decadencia cultural que tien la so correspondencia cola crisis económica, que produz un aumentu del paru y recortes en toles sectores, sobre manera nel públicu.

Dende la organización faen un llamáu a participar na convocatoria que la Plataforma Unitaria 8 de Setiembre va celebrar a partir de les 12.30 hores nos Xardinos del Náuticu de Xixón.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam