Llingua

SUATEA entama les II Xornaes Llingua Asturiana y Educación

07/03/2010 a les 10:30:59

El sindicatu SUATEA presentó les II Xornaes Llingua Asturiana y Educación, que se van celebrar ente'l 19 y el 20 de marzu nel Centru Cultural El Llano de Xixón. El cursu ta dirixíu a profesoráu de Primaria y Secundaria y el plazu p'apuntase ta abiertu hasta'l 15 de marzu.

Los asuntos que se van tratar nestes xornaes son l'estatus nuevu que garró la Llingua Asturiana na Universidá, en cuantes que mención en Maxisteriu y minor en Filoloxía; el tratamientu integráu de les llingües na escuela; los recursos web qu'existen pa la enseñanza del asturianu; les esperiencies na clas de Gallego-asturianu; los planes llingüísticos nos centros; y el material didáctico existente pa impartir l'asignatura. Amás, va dase un taller d'Edubuntu sobre'l sistema operativu GNU/Linux pa la enseñanza.

De toes estes cuestiones van falar Aitor Etxarte Berezibar, director d’Hegoalde Ikastola de Pamplona; Nel Caldevilla y Xulio Berros, profesores d’institutu; Xosé Antón González Riaño, profesor de la facultá Ciencies de la Educación de la Universidá d’Uviéu y académicu de l’ALLA; Xulio Viejo Fernández, profesor de la facultá Filoloxía de la Universidá d’Uviéu; Aurora Bermúdez, maestra na escuela de Tapia; Berto Cobreros Gil, pofesor d’institutu; Nacho Fonseca, maestru de Primaria; el Colectivu Softastur; y Paz Fonticiella y Concha Prieto, profesores de Llingua Asturiana d’institutu.

Los oxetivos d'estes segundes xornaes qu'entama SUATEA son normalizar y facer visible l'usu de la llingua asturiana y el gallego-asturianu ente l'afiliación del sindicatu y la comunidá educativa en xeneral; crear un espaciu cotidianu visible y al algame de la comunidá educativa y la docencia onde la llingua asturiana y el gallego-asturianu tean presentes; potenciar actitúes positives de la comunidá educativa hacia la llingua asturiana y el gallego-asturianu; valtar prexuicios y facer ver qu'estos idiomes son una canal de comunicación amañosa nel ámbitu educativu; animar a la reflexón y el contraste de proyectos, conteníos, métodos y actividaes rellacionaes cola enseñanza de la nuestra llingua; y intercambiar conocimientos y especiencies con otres comunidaes con llingua propia p'ameyorar la nuestra acción educativa nesta área.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam