Sociedá

Rosario Hernández Catalán: «La disponibilidá total del ama de casa esportóse al mercáu llaboral»

07/03/2010 a les 10:29:04

Filóloga, escritora, feminista, docente y defensora de la vida «real» frente a les «esclavitúes» modernes que xenera’l mercáu llaboral. Esti pue ser ún de los perfiles de l’autora del llibru «Pero este trabajo yo para qué lo hago» (Federación de Mujeres Jóvenes), nel que Rosario Hernández Catalán apurre un estudiu sociolóxicu «sobre los malestares ocultos de delles precaries conscientes».

BEATRIZ R. VIADO
Analiza les situaciones llaborales y personales de muyeres d'ente venti y cuarenta años. ¿Qué caracteriza a esti colectivu? ¿Qué situaciones o circunstancies comparten?
Caracterízales la precariedá, quier dicise, la falta de seguranza, la movilidá constante, la polivalencia, la necesidá constante de demostrar muncho pa consiguir poco, la formación continua, el correr ensin aparar pa, como mínimu, quedar nel mesmu sitiu, muncha vocación y muncha vocación quemada, sobre manera nel entornu de lo social. Comparten un horizonte que taramiella y que cuando yes más moza pue prestar, pero que col tiempu amoria.

Amás d'a les precaries fai referencia a les «cognitaries». ¿Qué quier dicir con esta espresión?
Avezo a usar cognitariáu nel so sentíu más ampliu. Falo d’esa economía posmoderna que nos esixe xenerar información, cuidaos, rellaciones, sonrises, comparecencies... Y la fábrica de toos estos requerimientos nuevos ta principalmente na mente de les trabayadores, nel aparatu cognitivu, d’ehí lo de cognitariáu frente a, por exemplu, mano d’obra, onde queda claro qu’ehí lo que se pide a l’asalariada ye más cuerpu, más fuerza física y destreces manuales en cuenta de mentales o emocionales. Cognitariáu son les dependientes, mediadores, monitores, psicólogues, teleoperadores... y al so públicu necesariu llamámoslo veceros, pacientes o alumnáu.

Fala de la Economía Nueva, una economía de servicios onde queda arrequexada la producción. ¿Acaba en venta hasta la propia personalidá nesti modelu económicu?
Pue tar segura. Ehí ta la clave, un llumbagu provocáu pol picu y la pala ye diáfanu, la rellación causa efectu ye evidente. Pero cuando ye’l to neocortex, el to sistema límbicu’l que das, quier dicise, la to mente y el to corazón, la to fortaleza intelectual y les tos habilidaes sociales y emocionales, ehí los riesgos son menos claros. Nun sabemos ver la rellación ente una depresión y un trabayu intelectual intensu na Rede, por falar del llamáu netariáu, nun solemos entender qu’arrodianos de xente estraño a lo que comprender, sonrir, tutelar, asesorar, esplicar y cuidar xenera llumbagu mental y emocional. Fartúcasete’l yo. La musculatura del ego fráyase de tanto comparecer. Visibilizar esto yera ún de los mios oxetivos. La empresa conviértese na to familia. Hai muncha inxeniería social invertida en consiguir que la trabayadora s’entregue del too. Y, viendo delles entrevistaes, consíguenlo. Dedico un capítulu a ello, a la entrega total.

¿Qué papel ta xugando'l trabayu na vida de les persones? ¿Ye una simple fonte d'ingresos pa subsistir, una fonte de realización personal...?
Trabayamos tamién pa cumplir suaños y materializar vocaciones, y entós ehí cuérrense munchos riesgos. Porque la periodista idealista, la pediatra cariñosa, la maestra vocacional o la trabayadora social reivindicativa acaben viendo que tou esi amor, esi ánimu y esa enerxía acaben fagotizaes de males maneres por un mercáu y un Estáu cicateros y nulamente humanistes. Y entós les suañadores moces quemen coles burocracies, les lentitúes, les ineficacies y los xefes ineptos y dalgo psicópates. Mui poques entrevistaes s’amparaben nel escepticismu o’l cinismu pa salvaguardar les sos psiques. La mayoría siguía creyendo y suañando. Les que defendíen que la realización personal vendría fuera del trabayu yeren les que trabayaben en sectores menos vocacionales (telemarketing, hostelería, prostitución...). El queme «postvocacional» nun les afectaba. Sabíen a lo que taben. Nun daba munchu pie pa desengaños.

Un datu interesante que da ye que la mayor parte de les entrevistaes diben siguir trabayando si-yos tocara la llotería y comenta que, en cuenta de sacar al Quixote que toes llevamos dientro, quédense col «Sancho Panza emprendedor». ¿Cómo ye esti personaxe y cómo interpreta esti apegu al trabayu?
Sí, llamóme muncho l’atención. Yo dicía-yos que’l premiu yera de millones d’euros, insistía-yos en que que podíen cumplir los sos suaños más alloriantes. Y nada. Dicíenme una vez y otra: «Non, non, yo diba siguir trabayando» o «montaría daqué». Y falaben de montar negocios una vez y otra. Chigres, tiendes... Nin recorrer el mundu, nin proyectos solidarios (a nun ser una), nin nenguna estravagancia. Taben bien apegadines al principiu de realidá. Suañaben poco. Nenguna utopía enriba la mesa. Ye tristemente significativo.

¿Cuánto hai de consumismu y cuánto de necesidá vital nes esclavitúes que xenera actualmente'l mercáu llaboral?
Les necesidaes cúbrense con poco. Los deseos con nada. Siempre hai dalgo más y más que comprar y por eso siempre hai que trabayar más pa consiguilo. El consumismu ye la cenahoria delantre’l burru. El burru ye la clas trabayadora. En tiempos de crisis pue mancar reconocer esto, cuando muncha xente nun tien ingresos, pero vivíemos penriba de les nuestres posibilidaes y de lo que ye digno en términos ecolóxicos, éticos y inclusive estéticos. Nun consumíemos según la nuestra capacidá d’aforru o les nuestres nómines, sinón según la nuestra capacidá d’endeudamientu.

¿Menos consumu diba implicar menos dependencia de condiciones abusives nel ámbitu llaboral?
Evidentemente. Decrecer, decrecer. Esa ye una clave. La frugalidá ye revolucionaria. De siempre. Porque amás toa esta megamáquina sofítase nos nuestros desaxeraos y histriónicos actos de consumu. Aguantamos vexaciones nel trabayu por hipoteques, por factures y deudes que munches veces cubren más caprichos que necesidaes. Too se resume coles palabres de Diógenes, a quien tando un día mui a gustu al sol comiendo llenteyes acercóse-y un sofista y díxo-y: «Ai, Diógenes, si aprendieres a afalagar al rei agora nun dibes tener que comer llenteyes». Diógenes respondió: «Ai sofista, si aprendieres a comer llenteyes agora nun dibes tener qu’afalagar al rei». Podía dicir lo mesmo citando a Sergio Latouche, Vandana Shiva, Piettila, pero con Di½genes ye m΅s claro. Interésame sobre manera la claridá. Al estudiu vertébralu l’afán divulgativu, porque la mayoría del pensamientu críticu ta escritu pa una minoría intelectual. Anque critiquen al Estáu, al capital y al patriarcáu, nun pueden evitar usar un estilu que, consciente o inconscientemente, ta destináu a seducir a los sos iguales académicos. Nel fondu escriben pa un imaxinariu tribunal de sabios (poques veces de sabies). Y yo namás quiero ser clara y, polo tanto, con Diógenes abonda.

Ún de los aspectos a los que fai referencia ye a cómo'l trabayu pue llegar a ocupar la totalidá del tiempu vital pola dificultá de desconectar o pol afán de tar en formación continua, a lo que s'amiesta l'eternu sentimientu de culpa de les muyeres. ¿Afecta esta invasión del trabayu na vida especialmente a les muyeres?
Especialmente, sí. La disponibilidá total del ama de casa que nun tien vacaciones y qu’hasta de nueche ta pensando nos llabores del otru día esportóse a la clas trabayadora nueva que, d’una parte, aprovecha los fines de selmana pa siguir formándose, y d’otra, nun ye quien a aparar los sos cerebros. Sales de trabayar a les cinco pero les mentes siguen actives, pensando y repensando nos asuntos del trabayu. Ye un motor neciu. Amás, gracies a les tecnoloxíes, tán lliberadores elles según la miopía tecnofílica, cualquier tiempu y espaciu pue convertise en tiempu y espaciu de trabayu. Col to portátil, el to iphone y el to móvil tas siempre conectada. Más bien enganchada, porque tas enganchada a la conexón, enganchada a tar siempre localizable y a lleer nel intre los últimos correos. Entós puedes tar nel tren disfrutando del paisaxe o consultando’l to corréu. Esto principia siendo lliberador, mui na llinia empresa nueva Google, onde trabayes cuando quieres, pero a la llarga traduzse en que trabayes siempre, siempre. Toles hores son productives. A les entrevistaes costába-yos una barbaridá desconectar. Y más que desconectar apigazaben cola tele, los porros, l’alcohol, la play... Col so puntín lúdicu y allegre, ye verdá, que tampoco nun ye too un Valle de Llágrimes.

La maternidá, l'estáu civil y l'aspectu físicu siguen determinando la «empleabilidá», en términos de la Unión Europea, de les oportunidaes llaborales de les muyeres. ¿Ye inmune'l mercáu llaboral a la llexislación sobre la igualdá y a los cambios sociales?
Inmune, inmune nun hai nada. Too ye permeable y too cambia, sobre manera’l mercáu llaboral, con unos plazos d’obsolescencia cada vez más curtios. Por exemplu, la empleabilidá de los homes güei tamién depende del físicu. Un comercial siempre va tener que cumplir más col canon estéticu qu’un obreru fabril. Ésta ye la verdadera razón de la existencia de los metrosexuales. En cuantes a les lleis, dalgo valdrán, el problema ta cuando les esquierdes se dediquen namás a redactar. A escribir una y otra llei ensin muncha materia detrás. L’exerciciu de lo público parez tar quedando nos últimos años namás na redacción de lleis, pero la realidá testerona esixe más que palabres. Amás, si llexisles de contino, les lleis acaben por perder la so fuerza performativa.

Impresiona ún de los casos, el d'una teleoperadora, que se quexa del control que la empresa exercía sobre'l so comportamientu nel tiempu de trabayu. ¿Hai dalgo más que disciplina llaboral nestos controles? ¿Qué ganen les empreses diendo más allá de lo estrictamente llaboral?
Ye humillante, tienen que pidir permisu pa dir al bañu, llévenles d’escursión una fin de selmana y canten canciones de la empresa... Ye como cuando cantabes aquello de «los Hermanos de la Salle qué bonos son que nos lleven d’escursión». Fai gracia, pero hai que vivilo. Recuerda a la primaria, a aquellos tiempos nos que te taben educando, nos que queríen non que producieres, sinón que te formares. Yeres una neña, pero cuando se tienen trenta años resulta más humillante entá. Les trabayadores ven amenorgada dafechu l’autonomía d’elles, porque decisiones tan soberanes y indispensables como les rellacionaes colos actos fisiolóxicos pasen de ser tomaes pola trabayadora, una muyer adulta, a ser tomaes pola xerencia. Infantilízase, contrólase y ménguase l’autonomía de la trabayadora con una práctica qu’a poca dignidiá y sensibilidá que se conserve acaba por humillar, como-yos asocede a les entrevistaes. Esto, sumao a la prohibición de llevantase del asientu y de falar coles sos compañeres, fai del puestu de trabayu una especie d’internáu, de reformatoriu onde les trabayadores les traten como menores d’edá de posguerra. Énte tal control de los tiempos, de les palabres y de los cuerpos exercíu pola xerencia ye bastante difícil que pueda haber un clima de compañerismu ente les trabayadores, de tal manera que la empresa, controlando y xenerando tensión, non solo estrume hasta l’últimu minutu de les sos empleaes, sinón que sabe crear el clima amañosu pa que nun se creen llazos ente les trabayadores, vieyes solidaridaes obreres que pueden avivar les ansies de dignidá. Esi ye l’oxetivu, romper llazos de clas. Y otru oxetivu ye’l simple placer del control, placeres pa los egos de les xerencies. Egos fráxiles y enfermos qu’al controlar a la trabayadora siéntense medrar. Mui vieyo too.

El trabayu ye una obligación pa la mayoría de la xente, al nun tener otres fontes de subsistencia. ¿Cómo facemos? ¿Hai dalgún trucu pa consiguir aquello de trabayar pa vivir y non vivir pa trabayar?
Vuelvo a insistir na frugalidá y amiesto a ello l’ayuda mutua, por exemplu en pareya. La pareya pue y tien que ser un espaciu d’ayuda mutua. Les cuentes tienen que salir col sueldu d’una de les persones qu’integren esa pareya. A ser posible col sueldu de la muyer nel casu de pareyes hetero (nun sía que volvamos al vieyu y peligrosu papel d’ánxeles de la casa). Eso supón que si la otra persona nun pue trabayar nun tiempu porque nun aguanta más pongamos, el mobbing, o quier descansar pa recuperar por completu la so salú integral pue dexase facelo porque col dineru de la otra persona pue subsistise. Una de les entrevistaes, Luz, defendía esta práctica. Yo tamién. Agora bien, esto supón un modelu de pareya mui honestu. Mui arrogante, ensin rocees. Plenamente igualitariu. Un equipu, sobre manera pa los tiempos de crisis. Esta ayuda mutua, esti colchón, esti agospéu había tamién procuralu la rede d’amigues y amigos. Porque l’amistá ye la familia del sieglu xxi. Pero insisto: esto supón arrodiate de xente mui especial. Y supón primero liofilizar (reducir) los consumos, como se liofilicen les empreses na Economía Nueva que quier funcionar cola mínima inversión. Y tamién diba ayudar muncho que los constructores y los poderes públicos nun se portaren nestos últimos años como una camaretada de pirates. Si’l preciu de la vivienda nun fora de vergüenza habría munchu más tiempu y espaciu pa la realización personal, la felicidá, la salú... Con esto quiero dexar claro que la trabayadora nun pue culpabilizase del too por ser consumista. Somos como’l mercáu quier que síamos. Salir d’esti círculu viciosu esixe enerxía, tiempu, coincidencies felices, pensamientos lúcidos... Y nun ye tan fácil. Non.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam