Asturies

Representantes destacaos del PP proponen tres candidatos pa ciarrar el pasu a Cascos

03/09/2010 a les 12:20:40

Representantes de les xuntes locales del PP d’Asturies propunxeron al comité electoral del partíu una terna de candidatos pa les elecciones autonómiques integrada pola presidenta del PP de Xixón, Pilar Fernández Pardo; la conceyala n’Uviéu Isabel Pérez-Espinosa; y el presidente del PP d’Avilés, Joaquín Aréstegui. Nun comunicáu, informen que la decisión garráronla tres reunise’l presidente del PP d’Uviéu y alcalde de la capital, Gabino de Lorenzo, amás de Fernández Pardo, Aréstegui y otros diecisiete presidentes de xuntes locales del partíu.

Tamién tuvieron presentes el secretariu xeneral del PP asturianu, Ramón Artime; el secretariu de Política Municipal, Carlos Guerrero; y el presidente de Nueves Xeneraciones d’Asturias, Pablo Álvarez Pire, ente otros. La terna de candidatos propuesta nun escuende que quieren ciarrar el pasu a Francisco Álvarez-Cascos y nun quier, así qu’así, «exercer nenguna presión sobre Mariano Rajoy, nin sobre la dirección nacional del partíu», afirmen nun comunicáu, onde tamién espresen que traten d’ufrir «opciones pa facilitar el determín» sobre’l candidatu del PP nes elecciones autonómiques asturianes de mayu del 2011.

Nel comunicáu, onde se refuga abiertamente la hipotética candidatura d’Álvarez-Cascos, a quien-y refierten que «despreció la oportunidá que tuvo de contar col apoyu del PP d’Asturies», insístese na viabilidá de Fernández Pardo, Pérez-Espinosa y Aréstegui como candidatos, tres políticos que tienen en común que son nuevos y con esperiencia política amplia».

«Representen n’Asturies lo que Feijóo en Galicia, Basagoiti nel País Vascu o Dolores de Cospedal, Pons y Soraya Sáenz de Santamaría nel ámbitu nacional», afirmen. Otra manera, tamién recuerden que toos tres candidatos «apoyaron ensin resquiebres nel congresu de Valencia a Mariano Rajoy y los sos planteamientos».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam