Economía

Refuguen en Senáu la enmienda de Foru que defendía la relevancia del carbón nel «mix» enerxéticu

REDACCIÓN. UVIÉU - 08/02/2012 A LES 18:38:06

El grupu parllamentariu socialista en Senáu refugó nel Plenu de la Cámara Alta, celebráu na mañana del miércoles 8 de febreru, la enmienda que presentara Isidro Martínez Oblanca a una moción que pidía ciarrar gradualmente les centrales nucleares. El parllamentariu de Foru defendía la minería del carbón y el so valor como refuerciu de la soberanía enerxética del Estáu.

Oblanca sorrayó la necesidá d'«impulsar la minería de carbón nacional por ser l'únicu combustible fósil autóctono» qu'hai nel Estáu y reclamó «la so relevancia nel mix de xeneración enerxética». Oblanca apeló a la Constitución Española, qu'obliga al Estáu a mirar «pol establecimientu d'un equilibriu económicu, amañosu y xustu ente toles partes del territoriu español», ente les que tán los valles mineros asturianos.

Nel debate, según señala Foru, «los portavoces socialista y popular coincidieron n'aparcar el so análisis sobre'l carbón pa un futuru debate sobre'l modelu enerxéticu español». Oblanca, pela so parte, refertó-yos que «les bones palabres sobre la minería del carbón nun s'acompañen colos fechos» y que «lo último que fixo'l gobiernu socialista foi dexar de firmar 180 millones d'euros pa los Fondos Mineros y lo primero que fixo'l gobiernu del Partíu Popular foi quitalos».

Oblanca tachó d'«ecoloxistes de quita y pon» a los socialistes, porque «la so posición al respective de ciarrar les centrales nucleares varia dependiendo de si tán en Gobiernu o na oposición». El senador asturianu destacó les previsiones de l'Axencia Internacional de la Enerxía en cuantes al consumu d'esti combustible fósil nos próximos años y sorrayó les investigaciones y los avances del Institutu Nacional del Carbón pa capturar CO2, «lo que nos va llevar a centrales de carbón llimpio que nun van xenerar efectu ivernaderu».

La moción socialista que pidía ciarrar gradualmente les centrales nucleares acabaron refugándola por 167 votos en contra, 82 a favor y 3 abstenciones.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam