Votos: 0

• 1
• 2
• 3
• 4
• 5

Protección Civil alerta del riesgu d’argayos en Los Picos de Europa

La Dirección Xeneral del Parque Nacional de los Picos d’Europa unvió una nota al Centru de Coordinación d’Emerxencies del 112-Asturies onde s’alvierte del riesgu d’argayos (de nieve o de tierra) per delles zones de Los Picos d’Europa, amás de les midíes de precaución que tienen qu’adoptar los visitantes.

El Parque Nacional avisa de que’l riesgu d’argayos aumentó estos díes. Nesti sen, y dada l’acumulación de nieve nos picos, modifícase la cota de riesgu. Asina, resulta peligrosa cualquier actividá de monte qu’implique metese peles rutes más altes del Parque Nacional de Los Picos d’Europa, inclusive per dalguna de les más andaes, sobre manera si se supera la cota de los 1.800 metros, y más nes hores centrales del día y de parte tarde.

Protección Civil, nesti sen, avisa de que se producen situaciones de riesgu al acercase a desbentíos peñascosos pol peligru de qu’argaye la nieve y la peña; tamién son peligroses les travesíes en lladera pola posible existencia de nieve xelao y l’andar per sitios onde pudiera haber sumidorios tapaos pola nieve. Tamién avisen del peligru de metese per canales estreches y pindies o andar baxo fasteres d’árgoma cubiertes de nieve.

Finalmente, el serviciu d’emerxencies recordó que ye especialmente peligroso, nestes condiciones, andar pel monte ensin equipu amañosu o en solitario, amás de practicar deportes d’iviernu como l’esquí de travesía o la escalada en xelu, particularmente ensin esperiencia previa.