Sociedá

La Plataforma Feminista d'Asturies critica «la escomanada cantidá de dineru público destinada pa financiar un sistema económicu que xenera desigualdá»

08/03/2010 a les 14:14:59

Cuando se cumplen cien años dende la instauración del 8 de marzu como Día Internacional de les Muyeres, la Plataforma Feminista d'Asturies llama a manifestase na marcha convocada esti llunes a les 20 hores na Plaza l'Humedal de Xixón, nuna xornada de «celebración y de llucha». La Plataforma aprovecha esti día pa denunciar «la escomanada cantidá de dineru público que se destinó a financiar un sistema económicu que xenera desigualdá, esclusión y destrucción, mentes que, en mayor midida, les muyeres pagamos les consecuencies d'una crisis y d'un contestu social onde salten les alarmes de graves retrocesos nes polítiques sociales, onde la privatización y el recorte de gastu aféctanos especialmente, sobre manera n'ámbitos como'l de la educación, la salú, la llei de dependencia y los derechos ciudadanos y llaborales con especial atención pa les muyeres inmigrantes».

Al empar, la Plataforma señala que dende'l feminismu «queremos alternatives polítiques y económiques qu'incidan nel oxetivu d'atender a les necesidaes de la ciudadanía y del planeta que nos acueye y non a les necesidaes de los mercaos».

Na manifestación de Xixón, el lema que va abrir la protesta ye Les muyeres tenemos muncho que dicir y el comunicáu final va lleelu la escritora y feminista Rosario Hernández Catalán. Amás, la marcha va tar animada pola Charanga Feminista Xuntes y Revueltes y el grupu El Ventolín.

Igualmente, la Plataforma convida a facer del 8 de marzu una xornada de «celebración y fiesta polo consiguío y en reconocimientu a les nuestres precursores; y otra xornada de llucha y reivindicación que recuerde y esixa a tola sociedá y a los poderes públicos lo qu'entá nos falta pa que la nuestra ciudadanía sía plena y la nuestra llibertá real».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam