Cultura

Pilar Sánchez Vicente: «Agora la novela negra tiende a ser novela social»

20/12/2010 a les 14:46:15

IVÁN G. FERNÁNDEZ.
Operación Drácula ye l’últimu trabayu de l’autora xixonesa Pilar Sánchez Vicente; nesta ocasión, preséntanos una trama policiaca onde les drogues, el sexu y los asesinatos en serie escuéndense tres la mano prieta de la mafia rumana.

Operación Drácula ye la so primer novela de xéneru negru o policiacu. Avezaos a lleer les sos noveles históriques, ¿por qué esti cambiu de rexistru agora?
En realidá nun ye un cambiu de rexistru, sinón que ye una deuda pendiente conmigo mesma dende hai tiempu. Cuando tenía 12 o 13 años pasé de lleer llibros d’Enid Blyton a Agatha Cristhie o Perry Mason y toles noveles qu’había en casa sobre esti xéneru. Nosotros siempre llamemos a la novela negra lliteratura d’evasión, porque la verdá ye qu’una novela policiaca puedes lleela nun viaxe, nuna comida y nuna cena, quiero dicir, date como muncho pa trés veces.
A partir d’esi momentu siempre lleeí novela negra. Amás, ente novela histórica y novela histórica tengo’l vezu de lleer, de manera compulsiva, novela negra. Tengo que dicir que precisamente por esi conocimientu del xéneru costóme muncho acercame a ella. Ello ye que Comadres, la primer novela qu’escribí, tien una trama negra en pequeño que ye como un apunte de lo qu’a mi me prestaba facer. Lo que pasa ye qu’hasta agora, que yá ye la sesta novela escrita, nun me sentí con fuerces pa llevar alantre’l retu verdaderu. Otra manera, tamién hai que dicir que como l’añu qu’entra cumplo 50 años nun quería llegar al mediu sieglu ensin saldar les mios deudes pendientes y, nesti casu, yera la novela negra. La cosa foi que yo llevéla a la editorial cola intención de que la sacara l’añu qu’entra pero quixeron publicala yá. La verdá ye que plasmé porque me garró un poco a contrapié. Esti yera’l mio regalu pa los cincuenta, pero, bono, el regalu vieno anticipáu. De toles maneres, anque fora una cosa inesperada yo toi encantada con ella y espero que-y preste al públicu.

Depués d’esta primer incursión nel xéneru negru, ¿ónde se siente más cómoda, na novela histórica o na policiaca?
Home, siéntome cómoda en cualquiera de les dos, pero, si te digo la verdá, la novela histórica sí qu’esixe un esfuerzu mayor a la hora d’escribir porque ehí nun puedes dar una puntada ensin que’l filu sía exacto, bien cortao y del mesmu color que lo demás. Polo tanto, la documentación pa una novela de tipu históricu normalmente llévame un añu y mediu. Sicasí, la novela policiaca non; anque tienes que documentate, evidentemente, pero nun ye lo mesmo. Hai que conocer les bases de datos de la policía, tienes que tener tocao un pistola, ver un catálogu de pistoles y saber qué tipu usaría’l to asesín, hai que se meter muncho nel llinguaxe policial. De mano, too esto vese en cualquier novela policiaca, pero tu tampoco te puedes fiar de lo que cuenten otros. La documentación ye fundamental, pero lo más importante ye la trama.

¿Y qué fontes usó pa escribir esta novela?
La mio fonte principal foi un axente de la policía que me diba resolviendo o orientando nes duldes que me diben saliendo de la qu’escribía. Tamién use documentos d’informes policiales sobre prostitución n’España. Utilicé muncha noticia periodística de radio y televisión, porque’l tema de la prostitución rumana ye un sacu ensin fondu que de contino sal nos medios de comunicación.

Les drogues, el sexu y los asesinatos marquen el paisaxe humanu d’esti trabayu. Esi paisaxe, ¿parez-y que ye mui diferente al que podía haber nes noveles negres de los años 80 o 90?
Agora la novela negra tiende a ser novela social, pasó de ser una cosa col detective duru a ser un reflexu de la sociedá. Nun hai más que ver les noveles sueques: cuando toos pensábemos que la sociedá sueca yera perfecta, con estes noveles desmitificóse esa imaxe. Nel xéneru negru, el tresfondu social va acelerándose progresivamente. La verdá ye que nun sé si nos años 90 el fenómenu de la prostitución se trataba como se fai agora

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam