Economía

El PIB asturianu baxó más que la media nel 2009

04/03/2010 a les 21:41:03

La economía asturiana contráxose l’añu pasáu un poco más que la media estatal, según datos que publica la Fundación de Caxes d'Aforru (Funcas), que cifra nun 3,95 por cientu’l descensu del Productu Interior Brutu (PIB), mentes que la caída en toa España foi del 3,83 por cientu.

Con estes cifres, Asturies tien el mesmu descensu porcentual del PIB que la Comunidá Valenciana, per detrás de les caíes d'Aragón (4,87 por cientu), Cataluña (4,69 por cientu), Castiella y Llión (4,25 por cientu), Canaries (4,18 por cientu), Castiella-La Mancha (4,04 por cientu) y Murcia (3,96 por cientu).

L'últimu númberu de los Cuadernos de Información Económica de Funcas, onde se recueyen los datos d'evolución del PIB nel 2009, analicen amás l'índiz de converxencia de les rexones españoles con Europa y otros indicadores sobre empléu y productividá.

No que tien que ver colos niveles de converxencia, la Fundación de Caxes d'Aforru señala a Asturies ente les comunidaes autónomes que nun superen la renta media europea. En concreto, l'índiz asturianu ye de 93,16 por cientu, per debaxo de la media española, que Funcas pon nun 100,86 por cientu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam