Economía

El paru vuelve a xubir n'Asturies y afecta más a la mocedá, les muyeres y el sector servicios

02/03/2010 a les 12:49:17

Esti mes de febreru llegóse a la cifra de 83.736 persones al paru n'Asturies, la cota más alta dende 1997, según Comisiones Obreres (CC OO), que matiza al empar qu'en términos interanuales «vese una desaceleración clara na destrucción de los puestos de trabayu». El desempléu afecta fundamentalmente a la mocedá, les muyeres y el sector servicios. Nesta coxuntura, el sindicatu considera qu'hai que «concentrar los esfuerzos de toles alministraciones na inversión productiva, la creación d'empléu y la protección social».

Esti ye'l tercer mes consecutivu que xuben les cifres del paru, que medraron en 2.811 persones en febreru, un 3,47 por cientu, lo que ye «preocupante», indica'l secretariu d'Empléu de CC OO d'Asturies, Miguel Iglesias Ballina, si se compara colo asocedío nel restu del Estáu, onde l'ascensu mediu foi del 2,03 por cientu. El sector onde más se notó la mengua de los puestos de trabayu foi'l de los servicios, con 1.859 persones más al paru qu'en xineru.

Énte estes cifres, Iglesias Ballina considera que'l recorte del gastu públicu comprometíu pol Gobiernu central nel Plan d'Estabilidá presentáu énte la UE «va na dirección contraria» d'iguar esta situación y «pon más difícil entá la salida de la crisis y la creación d'empléu», amiesta.

Sicasí, el líder sindical tamién aclaria'l que'l paru xubió menos qu'en xineru y que la cifra tamién ye más pequeña que la rexistrada va un añu na mesma fecha.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam