Actualidá

Otru informe policial fala de financiación illegal del PP valencianu

02/09/2010 a les 10:53:38

Un informe de la brigada de blanquéu de capitales de la policía, con fecha del 20 de xunetu, aporta más pruebes de la supuesta financiación illegal del PP valencianu. Según esti informe, l'ex-secretariu xeneral, Ricardo Costa, y el vice-secretariu d'organización, David Serra, contactaben con empreses contratistes de l'Alministración pa que blanquiaren una deuda de mediu millón d'euros del partíu cola empresa Orange Market, investigada na trama de corrupción del casu Gürtel.


L'informe, remitíu pola policía al Tribunal Superior de Xusticia de Madrid, diz que los actos del PP y del grupu parllamentariu popular nes Cortes Valencianes foron financiaos mediante un sistema triple de financiación: en primer llugar, «llibramientos fechos pol PP con fondos ayenos al sistema económicu real qu’enllenaben la caxa B d'Orange Market»; en segundu llugar, al traviés de «les factures reales emitíes por Orange Market a la formación política y abonaes por esta formación»; y refierse tamién a «les xestiones feches por responsables del PP valencianu pa qu’empresarios dueños d’empreses axudicataries de contratos públicos en vigor, financien los actos del PP mediante’l llibramientu de fondos a Orange Market». L'informe sostién qu’estos llibramientos «amazcárense con factures ficticies emitíes por esta sociedá [Orange Market] referentes a unos supuestos alcuerdos de prestación de servicios».


Ente les empreses que contribuyeron a pagar les deudes del PP valencianu ta’l grupu Sedesa, del que ye propietariu'l sobrín del vicepresidente terceru del Conseyu y titular de Mediu Ambiente, Juan Cotino, que pagaría más de 150.000 euros ente xunetu y avientu del 2008 a Orange Market; la empresa d'Enrique Ortiz, vinculáu al casu Brugal, que pagaría 232.000 euros ente avientu del 2008 y febreru del 2009; y Lubasa Desarrollos Immobiliarios, que tamién pagó, en xunetu del 2008, 58.000 euros.


El PP valencianu emitió un comunicáu onde afirma que la financiación ye del too llegal y que tuvo convenientemente fiscalizada cada añu. Del informe policial, dixo que «ye un informe falsu porque nun trata la financiación del PP; ye un informe parcial, tracamundiáu y antiguu».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam