Editorial

Obligaciones de la Universidá pa col asturianu

LES NOTICIES. 01/07/2011 A LES 10:28:34

La Universidá d’Uviéu ye la institución académica más importante del nuestru territoriu y, como tala, nella descansa la responsabilidá mayor en cuantes a la investigación de la nuestra llingua, pero tamién na formación del profesoráu d’asturianu, na divulgación xeneral del idioma y, en resume, na normalización.

La Universidá d’Uviéu tien que liderar les polítiques de normalización y visibilización del asturianu, y tien qu’empezar a desempeñar un papel protagonista nesti procesu. L’asturianu tien que ser llingua d’usu na Universidá y tien que permitise presentar cualquier documentación nesta llingua, tamién una tesis, non solo porque ye una paradoxa llamentable que la institución que más fai y tien que facer por estudiar y protexer el nuestru idioma nun lu use y nun dexe usalu a los alumnos, sinón tamién porque nun pue cayer na discriminación llingüística.

L’asturianu tovía nun ye una llingua oficial, ye verdá, pero eso nun quier dicir que los falantes nun tengamos derechos reconocíos nes lleis, ente ellos el derechu a que nun nos discriminen. La protección de les minoríes ha ser ún de los principios sagraos de la definición de la democracia, como dexaron afitao los grandes constitucionalistes de la Universidá d’Uviéu, empezando per Ignacio de Otto. Diba ser un error imperdonable pa una institución como la Universidá d’Uviéu nun s’axustara a la llegalidá vixente na redacción del Reglamentu d’Estudios de Doctoráu. Profesoráu, titulares de cátedra, alumnáu y equipu rector tienen que respetar les lleis y faceles cumplir independientemente de les opiniones que tengan sobre elles o de criterios de comodidá, lo mesmo que la ciudadanía. Esti ye un principiu fundamental de la democracia y un fin d’una institución pública, financiada por toos y toes.