Cultura

«La nueche de los muertos vivientes» llega a Colunga

05/11/2010 a les 10:43:29

Esti vienres 5 de payares, a les 19.45 hores, la Sala Loreto de Colunga va acoyer la proyección de la qu’anuncien como primer película doblada al asturianu. Trátase del clásicu de cine de terror La nueche de los muertos vivientes, dirixida en 1968 por George A. Romero.

La iniciativa de doblar esti filme al asturianu corrió al cargu de la productora Gonzali Producciones y realizóse nel estudiu CMG de Xixón. La traducción del guión corrió de la mano d’un grupu de persones procedentes de la cultura asturiana que trabayaron pa de llograr un llinguaxe cinematográficu inspiráu nel espíritu de la versión orixinal.

Na execución del doblaxe y na so post-producción participó un equipu de venti persones (14 dobladores, un director de doblaxe, un asesor llingüísiticu, un técnicu de realización, un técnicu de soníu y dos editores d'audiu y videu) que trabayaron a lo llargo de dos meses. La productora, dirixida pol realizador Illán Gonzali, piensa empecipiar el doblaxe de más títulos, lo que sería la continuación a les versiones n'asturianu subtitulaes de películes del cine mudu como Nosferatu, El Gabinete del Dr. Caligari, El Golem o Frankenstein.

La versión asturiana estrenóse en L'Arribada 2010, que se celebró en setiembre en Xixón. Y precisamente l'Asociación L'Arribada ye la que promueve la so itinerancia per otros puntos d'Asturies, como foi Corvera'l pasáu día 5 d'ochobre, va selo Colunga'l 5 de payares y Villaviciosa'l 27 de payares. La proyección va presentala Berto Peña, miembru de l'Asociación.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam