Llingua

«Nomes d'Asturies» conviértese nun llibru DVD-ROM pa les clases d'asturianu

DAMIÁN BARREIRO. UVIÉU - 28/06/2011 A LES 16:41:43

La Conseyería d'Educación y la RTPA van editar un llibru DVD-ROM sobre'l programa de radio-teatru de la RPA Nomes d'Asturies. Nesti DVD inclúinse nueve programes, seis pieces d'otros programes con actividaes de comprensión oral, una antoloxía poética y una biblioteca d'efectos sonoros. La presentación oficial va ser el miércoles 29 de xunu, a les 18 hores, nel palaciu de Toreno, na plaza Porlier d’Uviéu. Nella van tar Herminio Sastre, conseyeru d’Educación y Ciencia, y dellos directivos del Ente Públicu.

Esti llibru tien como autores a un equipu de profesores de Secundaria formáu por Pablo Rodríguez Medina, Mercedes Tarano Fondón, Monserrat Fueyo, Xermán Fierro y Azucena Álvarez. L’equipu d'ilustradores ta formáu por Alfonso Zapico, David Fernández, Xulio Arbesú, David Fernán, Carolina Calleja y Miguel Angel Chayán. El montaxe sonoru ye de Lucía Menéndez Díaz-Palacio y Chechu García ye'l coordinador d'esta publicación.

El resultáu d’estes unidaes didáctiques ye frutu d’un análisis del espaciu radiofónicu Nomes d’Asturies, un programa de la RPA qu’usa la fórmula de radio-teatru. Dellos capítulos del espaciu escoyéronse pol so valir pedagóxicu y educativu y van ser la base pa crear les unidaes didáctiques agora publicaes. La naturaleza de los materiales que formen parte d’estes unidaes ye mui variada. Asina, recuéyense elementos auditivos, visuales, creativos y participativos. Con estos elementos quier ayudase a la compresión oral del alumnáu, a trabayar la lliteratura asturiana y a averase al mundu de la radio.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam