Sociedá

Naz «Praza Pública», un nuevu diariu dixital en gallegu

IVÁN G. FERNÁNDEZ. UVIÉU - 02/02/2012 A LES 10:56:15

«Praza Pública naz pa romper un cercu de silenciu qu'afuega tantes voces valioses, pa romper el pesimismu que se nos intenta imponer como fe fatal». Estes son les primeres llinies que se puen lleer nel editorial de praza.com, el diariu dixital en gallegu que nacía el 1 de febreru col oxetivu de «recuperar l'espaciu perdíu poles cabeceres» nesta llingua nel últimu añu y mediu, o, lo que ye lo mesmo, el pieslle de la edición impresa de Galicia Hoxe, Xornal de Galicia, A Nosa Terra y el diario dixital Vieiros.

Los sos promotores aseguraron que se va trabayar de manera «independiente» y esperen qu'esti proyectu nuevu contribuya a «la pluralidá de los medios de comunicación». Praza Publica va tar dirixíu pol periodista Marcos Pérez, que va tar acompañáu por dos periodistes y dellos collaboradores.

Les llinies que definen esti proyectu dixital son la defensa del autogobiernu, del progresu y del bienestar de la ciudadanía gallega y la reivindicación de la llingua y la cultura gallega «como valores esenciales d'esa Galicia que vien».

Otra manera, la Mesa pola Normalización Lingüística espresó el so apoyu «incondicional» a los proyectos mediáticos nuevos gallegos y en gallegu que tán apareciendo. Nesi sentíu, la plataforma de defensa de los derechos llingüisticos de los gallegofalantes considera «una bona noticia» que, amás del recién estrenáu mediu dixital, otros proyectos como Sermos Galiza o Dioivo «tean tamién trabayando pa sumase a la reconstrucción d'un espaciu comunicativu en gallegu».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam