Asturies

Naz n'Asturies el partíu Ciudadanía y República (CyR)

11/01/2010 a les 11:05:00

El 7 de xineru pasáu formalizóse en Xixón la fundación del partíu políticu Ciudadanía y República. La iniciativa parte de los miembros de la Federación Republicana de Asturias d'ideales «radical-socialistes y d'esquierda lliberal» que, según s'esplica en nota de prensa, «oblíguennos a siguir empeñaos en defender un programa necesariu frente al dogmatismu y el pensamientu únicu nacionalista, l'ascendente corrupción política, la chochez educativa, la manipulación informativa y la decrepitú económica».

La «primer responsabilidá» de Ciudadanía y República ye concurrir a les elecciones «pa llevar a les instituciones el programa propuestu a los ciudadanos». La organización naz con una política «de puertes totalmente abiertes, pero refractariu a la xente pa quien la política nun tien nengún valor, que destinen tolos sos esfuerzos a la maquinación y trapisondes del poder». Al tiempu, el partíu informa de que la so prioridá ye la reforma constitucional «p'adoptar un Estáu republicanu y federal».

El partíu va celebrar dientro poco'l so Congresu Constituyente «onde tolos afiliaos pueden presentar la so candidatura a cualquier órganu y ser votaos polos sos compañeros en condiciones d'igualdá».

La intención de CyR ye crear una organización «d'abaxo hacia arriba onde la democracia participativa sía la columna vertebral del so funcionamientu». L'oxetivu ye ufiertar a la ciudadanía una opción «netamente republicana» y pa eso van recuperar «la tradición democrática española d'aquellos que buscaron persistentemente nel nuestru país instaurar la llibertá política, la igualdá ciudadana, la xusticia y la fraternidá».

Una de les caracterísitiques de la República que defende'l partíu ye que la cuestión indentitaria y llingüística «sían un derechu pero enxamás un priviliexu», indiquen, pa conformar un territoriu onde «los españoles sían el tou ensin que nunca los nieguen como parte». RyC declárase federalista «como sinónimu d'unidá a un proyectu común n'oposición radicalmente al llamáu nacionalismu escluyente».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam