Les Noticies.com. Diariu dixital. 17-05-2012
Nacho Carballo: «L’asturianu va tener el so espaciu nel Festival»
IVÁN G. FERNÁNDEZ. XIXÓN - 19/01/2012 A LES 11:06:38El cineasta xixonés Nacho Carballo asegura ser una persona valiente y que «tira p’alantre con too», a pesar de les crítiques depués del so nomamientu como director del Festival de Cine de Xixón en sustitución de José Luis Cienfuegos, que tuvo al frente del eventu más internacional de Xixón a lo llargo de 16 años.
¿Siéntese usté l’enemigu públicu númberu ún?
Nestos momentos sí, por supuestu. Pero, bono, l’enemigu públicu d’una parte de la xente y de los profesionales que puedan opinar. Al empar, nun me siento culpable. Puedo sentime l’enemigu públicu porque m’etiquetaron ehí, pero nun me siento culpable porque yo nun tengo culpa del cambiu na dirección de FICXixón.
Nesti espaciu de tiempu tan curtiu y cola polvareda que llevantó nos medios el so nomamientu, ¿llegó a pasa-y pela cabeza la idea d’arrenunciar al cargu?
La verdá ye que non, en nengún momentu me pasó pela cabeza esa idea. Teníemos mui claro que diba tener muncha repercusión, anque non hasta los niveles que ta llegando, inclusive con amenaces personales y insultos, que ye una cosa que me parez lo último de lo último. Si’l problema nesti país y n’Asturies ye que se cambie’l director del FICXixón, apaga y vámonos. A mi preocúpame más la xente que nun tien trabayu o los que tán echando de munchos sitios.
Volviendo a la so pregunta, nunca me pasó pela cabeza dimitir. Considérome una persona mui valiente y que tira p’alante con too. Toi convencíu de que vamos ser quién a cambiar la opinión de la xente, con trabayu y esfuerciu, porque esa ye la única manera de facer les coses.
¿Qué presencia va tener la llingua asturiana nesta etapa nueva de FICXixón? ¿Va mantenese lo que se facía hasta agora o va dise más p’allá?
De mano, nun tenemos que nos avergonzar de la nuestra llingua y parezme que l’asturianu va tener, dientro de FICXixón, el so espaciu. A día de güei nun puedo concretar cómo va ser esi espaciu, qué ye lo que vamos facer y qué ye lo que va cubrir, pero, repito, va tener el so sitiu.
Pues lleer la entrevista completa na edición impresa de LES NOTICIES.
Comentarios fechos (6)
Nel 23/01/2012 a les 11:25:00
El que nun haiga dengún cineasta, actor, etc, asturianu (y non asturianu)que salga en defensa o sofite al sr Carballo da muncho que pensar. Hasta Garci dixo que nun lu conoz de nada¿?.
Cuando'l PSOE fixo lo mesmo con Pepe'l Fereiru nel Muséu de Grandas, hubo una montonera de persones del mundu museísticu, d'asociaciones,etc. que salieron na so defensa.
¿Alcordáisvos de lo que dicía daquella Cascos y los sos acólitos? Cuantes vueltes da la vida. Hipócrites
fiernando 21/01/2012 a les 02:00:14
El Carbayu esti, por qué ta enfadáu?
POLVOREDA!!! 20/01/2012 a les 14:21:41
Qué ye eso de polvAreda??? Ciñéndose a l'ALLA que yo siempre oyí polvorea.
Lluisu 19/01/2012 a les 19:23:19
Dalgunos quieren ganar con boicots lo que nun ganaron nes urnes. Detrás de tol xaréu montáu tán los que perdieron el gobiernu del país y del estáu: PSOE y IU y los cineastes que vivíen alrodiu d'ellos, esos de "la ceya". La nueva dirección del festival tien tol derechu a que les crítiques o los afalagos se faigan única y esclusivamente valorando les ediciones que faigan nos años venideros. Crucificalos, calumnialos y refugalos ensin da-yos tiempu a demostrar nada ye facismu cultural puru y duru.
Naivam 19/01/2012 a les 14:38:27
Cualquier motivu ye buenu p'armala contra la "derechona". Los progres por definición son los buenos, los que tan col Pueblu, los que faen les coses bien, etc. Ye inadmisible pa esta xente qu'otru partidu, y más de dereches, quiera dai al festival otra orientación (como diz Glayu). Munchos asturianos queremos cambios d'esti tipu. Los progres non son más que otra modalidá política y idiolóxica tan cuestionable como les demás.
Lesnoticies.com - Nacho Carballo: «L’asturianu va tener el so espaciu nel Festival»
Nacho Carballo, director del FICXixón. Foto: Nanel Costa
11/05/2012 - La Xunta de Toponimia acepta «Guimarán»
25/04/2012 - L’Asociación d’Escritores d’Asturies nun contempla l’asturianu nos XIII Premios de la Crítica
12/05/2012 - Asturies arrasa A Baixa lisboeta
26/04/2012 - Carlos Suari vuelve'l Premiu de la Crítica 2009 pola decisión de retirar les categoríes n'asturianu
14/05/2012 - LESNOTICIES.COM ufierta una galería colos meyores momentos del Festival de la Mázcara Ibérica
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
