Actualidá

Muerre asesináu en Gaza l'activista y periodista Vittorio Arrigoni

15/04/2011 a les 10:19:48

L'activista y periodista italianu Vittorio Arrigoni, voluntariu en Palestina del Movimientu de Solidaridá Internacional (ISM, poles sos sigles n'inglés), foi asesináu na Franxa de Gaza.

El Gobiernu de Hamas difundió la noticia nun comunicáu tres del secuestru del activista italianu a manes d'un grupu radical islámicu, la Brigada Mohammed Bin Moslama, que rellacionen con Al Qaeda. Esti grupu radical amenazó, al traviés d'un videu difundíu n'Internet, con asesinar a Arrigonni nun plazu de trenta hores si'l Gobiernu palestín nun ponía en llibertá al líder del grupu islámicu opositor, el xeque Abu Walid al-Maqdasi.
Esta amenaza cumplióse enantes de tiempu por razones desconocíes. Vittori Arrigoni participó activamente na causa palestina a lo llargo de diez años. Nos últimos dos y mediu tuvo en Gaza col ISM siguiendo y denunciando les violaciones de los derechos humanos por parte d'Israel. Al empar, tuvo apoyando la resistencia popular palestina contra la ocupación israelina y informaba nel periódicu italianu Il Manifesto sobre la situación de Gaza. Arrigonni foi deteníu y encarceláu en delles ocasiones poles fuerces de seguranza israelines por ayudar y participar na resistencia popular palestina non violenta na Ribera Occidental y na Franxa de Gaza.
Otra manera, según dellos corresponsables italianos que conocíen al activista del ISM, posiblemente hubo dalgún problema na negociación que fixo entainar los acontecimientos.
Hai tiempu que l'activista italianu –y tamién el periodista y activista asturianu Alberto Arce– foi oxetu d'amenaces por parte de grupos radicales israelinos y de la estrema derecha norteamericana. Tanto Arrigoni como Arce foron señalaos como'l blancu númberu ún pa les fuerces terrestres d'Israel. Per otru llau, l'últimu mensaxe publicáu por Vittori Arrigoni foi'l 13 d'abril nel so blog de Guerrilla Radio, onde escribía: «Cuatro trabayadores morrieron ayeri pela nueche a causa del esbarrumbe d'un túnel escaváu debaxo de la frontera de Rafah (Exipto); al traviés d'esos túneles pasen tolos bienes necesarios que permiten la supervivencia de la población de Gaza estrangulao dende hai cuatro pol criminal cercu israelín».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam