Votos: 4

• 1
• 2
• 3
• 4
• 5

Más del 50 por cientu del alumnáu de Primaria estudia Llingua Asturiana

El 55,4 por cientu del alumnáu de Primaria de la escuela pública, un total de 17.053, estudien Llingua Asturiana. En Secundaria, tamién na rede pública, la cifra baxa hasta'l 18,03 por cientu, con 3.163 alumnos escolarizaos, y nel Bachilleratu queda nun 3,7 por cientu, lo que supón 374 rapazos matriculaos n'Asturianu. Esta mengua nes matriculaciones produzse en bona midida pola situación d'optatividá de l'asignatura nos ciclos superiores, tal como punxo de manifiestu Xosé Lluis Colodrón, miembru de SUATEA, na presentación del llibru I Xornaes Llingua Asturiana. Llingua y Educación. Nesti actu, el sindicalista acusó a l'Alministración de tar na «illegalidá» por nun dar l'estatus de materia voluntaria a Asturianu, «como diz la Llei d'Usu», recordó.

Les cifres de l'asignatura de Gallego-Asturianu, según los datos de la Conseyería d'Educación pal cursu 2009-2010, son entá más baxes: na rede pública, el 22 por cientu, 252 alumnos, estudien Gallego-Asturianu en Primaria; en Secundaria son el 12,8 por cientu, lo qu'equival a 124 matriculaciones, y en Bachilleratu les once persones matriculaes suponen el 2,5 por cientu sobre l'alumnáu matriculáu na zona.

Tocante a la concertada, la presencia de la Llingua Asturiana ye cuasimente residual. En Primaria namás el 18,1 por cientu de los centros –10 de 55– ufierten l'asignatura y nellos namás el 5,6 por cientu la escueye, un total de 710 alumnos. En Secundaria dan la posibilidá de matriculase en Llingua asturiana 5 de 57 centros y nellos opta pola asignatura'l 1,9 por cientu, 196 alumnos, mentes qu'en Bachilleratu nun s'apurren datos.

Pa dar estes asignatures cuéntase con 184 maestros en Primaria y 76 en Secundaria. La inmensa mayoría d'ellos ta en situación d'interinidá: namás venti docentes en Primaria y cinco en Secundaria tienen la categoría de funcionarios de carrera, una categoría a la que, con too y con eso, s'accede per otres asignatures al nun haber oposiciones pa Llingua asturiana y Gallego-Asturianu.

Ún de los fechos sobre los que llamó l'atención SUATEA tocante a la escolarización n'Asturianu foi'l qu'ésti nun tea presente na Educación Infantil, etapa na que'l sindicatu recurrió'l currículu va un añu y ta esperando la sentencia xudicial: «Recurrímoslu porque nél nun se fai nenguna referencia a la Llingua asturiana y ye absurdo que nun s'escolarice n'asturianu nesti ciclu, onde habíen dir los máximos esfuerzos al ser un momentu crucial pa escolarizar a los neños na so llingua materna, pero nun se ta faciendo nengún esfuerzu», denunció Xosé Lluis Colodrón. Al tiempu, el sindicalista recordó que l'idioma autóctonu tampoco nun tien presencia na FP o na educación p'adultos.

Estes cifres diéronse nel marcu de la presentación del llibru I Xornaes de Llingua Asturiana. Llingua y Educación . Nesti informe recuéyense les intervenciones que se fixeron nel alcuentru que SUATEA celebró va dos años sobre la problemática y l'estáu actual de la enseñanza n'idiomes minorizaos.

Nel llibru inclúinse artículos nos que s'espón el marcu xeneral de la normativa pa la escolarización nuna llingua minorizada, tanto a nivel européu como español y asturianu. Igualmente, recuéyense esperiencies nesti campu d'enseñantes d'otres comunidaes y d'axentes sociales, como la Xunta pola Defensa de la Llingua Asturiana o Xeira, y mediáticos, como LES NOTICIES. «Too esto permítenos tener una perspectiva global pa enfocar la enseñanza n'asturianu», apuntó Colodrón. Esti material va repartise peles escueles y nel Conceyu de Xixón, que collaboró, na celebración de les xornaes, xunto al CPR de Xixón, la confederación STES y el Gobiernu asturianu. A ésti últimu van face-y llegar tamién dalgún exemplar «pa que tome nota de lo que pasa n'otros ámbitos y cambie'l rumbu de la so política llingüística».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam