Actualidá

Martxelo Otamendi: «Si nos absuelven, depués vamos pidir xusticia pol dañu causáu»

09/03/2010 a les 11:00:00

Berria, diariu n’eusquera, «cubrió’l güecu que dexó Egunkaria» cuenta Martxelo Otamendi, director d’esti mediu y qu’ocupaba’l mesmu puestu cuando’l xuez Juan del Olmo ordenó ciarralu cautelarmente nel 2003 cola acusación de qu’ETA financiaba’l periódicu. Siete años depués, el xuiciu acabó y l’equipu directivu ta a la espera d’una sentencia na que piden l’absolución, depués d’un procesu «con acusaciones que nun se sosteníen», esplicó Otamendi na so visita a Asturies, onde tuvo convidáu pol local Cambalache d’Uviéu.

BEATRIZ R. VIADO
El xuiciu ta vistu pa sentencia. ¿Qué espectatives tienen?
Nosotros pidimos l’absolución. Llevamos siete años diciendo que nun teníemos nenguna rellación con ETA, díxolo tamién el fiscal, nun hai acusación de la Fiscalía, polo que nun tendría nengún sentíu qu’haya una sentencia condenatoria. Lo que pasa ye que dictar sentencies absolutories nun ye un deporte mui practicáu polos maxistraos de l’Audiencia Nacional, pero habrá que tener l’enfotu de que nesti casu nos dean l’absolución. Y, si nos la dan, depués vamos pidir xusticia, porque nun ye lo mesmo absolución que xusticia. Cola absolución llíbreste de la cárcel, pero la xusticia ye’l reconocimientu del dañu causáu a la imaxe de les persones, del diariu, del eusquera, a los nuestros llectores, a les alministraciones...

L’acusación principal foi la vinculación con ETA. A pesar de qu’haya sentencia absolutoria, ¿hai manera de llimpiar la imaxe d’eses afirmaciones?
Non, pero si hai sentencia absolutoria, la Guardia Civil, el xuez Juan del Olmo y les asociaciones populares que nos acusen, dalgo van tener que dicir. Nun se pue salir tan campante nesta historia. L’acusación principal yera qu’ETA financiara’l diariu. Esa foi la tesis de la Guardia Civil, el xuez creyóla y ciarró’l diariu, y detrás l’Asociación de Víctimas del Terrorismo (AVT) y Dignidad y Justicia faen les sos acusaciones. Ehí van tener que responder la Guardia Civil y los responsables políticos, que ye’l Ministeriu del Interior. El dañu ta fechu: díxose que yera una mancheta que dependía d’ETA, lo que ye una ofiensa y col riesgu de que si los xueces dicen que ye asina vamos a la cárcel. Tenemos peticiones de cárcel de catorce años: doce por pertenencia a ETA y dos por ser miembros de la dirección d’ETA, ensin que demostraren absolutamente nada. Pero nesti casu topáronse con un fiscal que nun sigue la llinia habitual d’asumir tolo que diz la Guardia Civil. El fiscal plantóse nel 2006, cuando se presentó l’autu procesal de 600 páxines y dixo qu’ellí nun había nada y propunxo más d’una vez que’l xuiciu nun se celebrara. Al final celebróse, pero’l fiscal a nós nun nos preguntó, lo que foi positivo. Creo que ye la primer vez que na Audiencia Nacional, nun xuiciu rellacionáu con ETA, el fiscal nun pregunta y, sicasí, a la Guardia Civil sí que-yos preguntó y púnxolos más d’una vez contra la paré pa que rescamplara que nun se desmostrara nada.

Nel casu del diariu Egin asocedió dalgo asina: primero l’acusación foi de vinculación con ETA y depués buscáronse delitos económicos. ¿Siguióse esta pauta d’actuación con Egunkaria?
Nel nuestru casu l’acusación nel momentu de ciarrar ye qu’ETA financia’l diariu, polo que se supón que lu tutela a traviés del nomamientu de directivos de confianza. Después d’años d’investigación, el xuez tópase con que nun hai nenguna financiación d’ETA y lo que fai ye acusanos directamente de que somos d’ETA. Depués hai unos segundos delitos fiscales n’otru xuiciu que ta tovía pendiente, pero que nun tien el mesmu pesu qu’ésti. El xuez quitó fuerza a l’acusación de vinculación con ETA pola financiación y limítase a dicir que somos d’ETA. El fiscal diz que non, que ta demostrao que nun somos d’ETA, y agora ye la Sala la qu’ha decidir.

¿Cómo interpreten esti procesu? ¿Parez-yos qu’hai una intencionalidá política tres d’él?
Sí, evidentemente. Nun tenemos acusación privada, que sería l’acusación de les víctimes directes d’un delitu que nós cometiéremos. Tampoco nun hai acusación del Estáu, de la Fiscalía. Trátase d’una acusación popular, de l’AVT y Dignidá y Justicia, unes asociaciones que se dediquen a incordiar a l’Audiencia Nacional denunciando cualquier manifestación política nel País Vascu que se pueda vincular con ETA: llegóse al esperpentu inaceptable de qu’en plenu procesu de paz, por conversaciones públiques que tuvieron el lehendakari Ibarretxe o Patxi López con Otegui delantre de les cámares de televisión, fixéronse esti tipu d’acusaciones. Una asociación pantasma como Manos Limpias interpón la denuncia, hai unos xueces que tienen gana de xaréu y acaben sentando nel tribunal a Patxi López, a Ibarretxe y a Otegi. Nesi casu decidieron qu’ensin l’acusación de la Fiscalía y ensin acusación privada nun tenía xacíu’l xuiciu, polo que se suspendió. Nel nuestru casu pidimos que s’aplicara la mesma norma –sería un casu clónicu–, pero decidieron siguir alantre.

Sía como sía la sentencia, la cuestión ye que se ciarró un periódicu. ¿Hai manera de rectificar o compensar esti fechu?
Ciarróse un periódicu cuando la Constitución española diz que namás se pueden ciarrar periódicos depués d’una sentencia xudicial o depués de que se declarara l’estáu de sitiu. Nel casu d’Egunkaria foi por una orde xudicial, polo que’l ciarramientu foi illegal y inconstitucional, porque l’estáu de sitiu nun se declaró, a nun ser que vivamos nun estáu de sitiu ensin declarar. Amás ciárrase cautelarmente, ye provisional, pero’l mesmu maxistráu obliga a los xestores de la empresa, baxo control xudicial, a liquidar la empresa: tolo que la empresa tien ha ponelo enriba la mesa, hubimos vender ordenadores, meses, sielles... Too. D’ehí salió un superávit de 600.000 euros que tán reteníos na Audiencia Nacional a la espera de que la sentencia diga si somos culpables o non. Ello ye qu’hai una voluntá clara del maxistráu de que’l ciarramientu cautelar sía efectivu. Esa empresa ta liquidada. Ciarrar un diariu ye una cuestión mui grave en democracia. Los medios de comunicación son los garantes de la llibertá d’espresión, son los pocos preseos que-y queden a la sociedá pa denunciar los abusos de los poderes. El xuez Garzón yá ciarró l’Egin y Egin Irratia en 1998 y agora ta llevando esto Del Olmo.

¿Cómo s’abrió’l casu? ¿D’ónde surden les acusaciones?
Nel añu 2001 la Guardia Civil pasó-y un informe a Garzón con una propuesta d’investigación pa que la autorizaren a siguir investigándonos. Garzón nun lo autorizó porque nun vio motivos pa dar el preste a esta investigación. Entós la Guardia Civil entregó l’informe al fiscal Fungairiño, ésti pása-ylu al maxistráu Del Olmo, que parez ser que quería facese famosu y ciarrar él tamién un diariu. Así qu’él sí autorizó la investigación nel 2001, de la que nun supimos nada hasta febreru del 2003, cuando ciarró’l diariu. Pero’l piesllu nun ye la culminación d’unes investigaciones, sinón el principiu. El xuez ciarra’l diariu baxo l’acusación de qu’ETA financia’l periódicu, pero cuando acaba la so parte de la investigación, la so tesis final, que ye l’autu de procesamientu, en 600 páxines nun fala nada de la financiación d’ETA, cuando’l motivu principal qu’esgrime nel autu pa ciarralu ye qu’esi diariu taba financiáu por ETA. Fuimos a xuiciu pa nada. Él mesmu se da cuenta de que la razón principal qu’argumenta pa ciarrar el diariu nun tien xaciu porque nun topó nada. Pero nun pue echase atrás depués de ciarrar un periódicu, polo que nos acusa de lo que sía, como de que somos d’ETA. Nel xuiciu nun se faló nada de si ETA punxo o non dineru nel periódicu, nin nos preguntaron por esto. Los espertos de la Guardia Civil acusábennos de ser d’ETA, como acusen a mediu país, pero non de qu’ETA nos financiara. El xuez dase cuenta de que lo que-y cuenta la Guardia Civil nel 2001 nun ye asina, pero yá avanzó tanto que nun hai vuelta y tien que siguir alantre.

¿Cómo valoren el tratamientu del casu nos demás medios?
Nun tenemos muncha quexa colos medios. Dellos nun nos fixeron casu, y meyor, porque, total, diben insultanos de cualquier manera. Los que lo trataron fixéronlo bien. Nos medios de comunicación europeos y norteamericanos hubo muncha atención al casu, porque ciarrar un diariu y que sía l’únicu n’eusquera, arrestar al equipu directivu, acusar a eses persones de ser d’ETA, incomunicales y torturar a cinco o seis d’eses persones creó munchu espolín. The Washington Post, The New York Times, The Gardian... escribieron de nós. Nun creíen que nel añu 2003 pasara eso n’Europa y n’España. Los medios de Madrid tán un poco más distantes, sobre manera los qu’al principiu siguieron la tesis de la Guardia Civil. Depués yá se dieron cuenta de que’l xuiciu nun tenía munchu xacíu y esos medios que de mano sofitaren aquella tesis dalgunos cuasi nin informen del casu, porque se dieron cuenta del xaréu qu’había. Tamién nos prestaba agradecer a LES NOTICIES la información que dio sobre’l casu y a los asturianos que nestos años se solidarizaron con nosotros.

El parllamentu vascu pidió l’absolución y hubo bien d’apoyos a nivel periodísticu, social y internacional. ¿Qué significaron pa ustedes estos apoyos?
Tamos mui agradecíos y endeudaos cola xente. Nel País Vascu y en Cataluña la solidaridá foi grandísima nestos años. Amás, hai grupos d’apoyu en Madrid, Zaragoza, Valladolid, agora venimos a Asturies... Nun tenemos quexa cola xente, la xente créenos, arrópanos, llámanos pa dar conferencies…

Nel momentu de la detención yá denunciaron que sufrieron tortures de la Guardia Civil. ¿Falóse d’esto nel xuiciu?
Nel xuiciu, los maxistraos, d’una manera non mui habitual, dexáronnos rellatar les tortures, lo que ye interesante pa nós, porque habitualmente l’Audiencia Nacional nun dexa contar tortures, los maxistraos dicen que nun tien interés y que nun ye un xuiciu de tortures. Valoramos positivamente que la Sala nos dexara contar esto y, otra manera, nós yá denunciemos les tortures en sé xudicial y cada casu de tortures trai una situación distinta. La mía yá fixo’l recorríu de tol sistema xudicial español, que foi archivando les denuncies, y toi yá na sección del Tribunal de Derechos Humanos d’Estrasburgo, que ye la última xerarquía xudicial que nos toca. Tamos a la espera de que s’acepte o se refugue la denuncia. Hai qu’aclariar qu’Estrasburgo nun repite’l xuiciu. Lo que fai’l Tribunal ye ver si nel procesu hubo garantíes xudiciales, si se fixo too bien. Nel mio casu negáronse a llamame a declarar, lo que foi bastante escandaloso. Tampoco nun llamaron a declarar al mozu que taba na mesma celda que yo y que vio cómo llegaba depués de les tortures. Negáronse a incorporar al procesu la cinta onde se grabó cómo declaraba depués de cinco díes d’incomunicación delantre del xuez Del Olmo, llorando, rotu y cuasi muertu, cuénto-y les tortures, pero niéguense a incorporar esa grabación. Ello ye que consideramos que nun hubo bastantes garantíes procesales y qu’Estrasburgo pue entrar ehí. Sicasí, xuega a la nuestra contra’l que n’Estrasburgo namás s’almiten el cuatro por cientu de les denuncies presentaes, polo qu’hai munches posibilidaes de que nun nos almitan la denuncia. Otra manera, la denuncia de Xabier Oleaga ta nel Tribunal Constitucional, un pasu enantes; les de Txema Auzmendi tán nuna especie de llimbu xudicial; y Iñaki Uría diba dir a xuiciu, anque al final los maxistraos decidieron que non.

Xusto depués de ciarrar Egunkaria creóse’l Berria. ¿Foi la continuación d’Egunkaria, nació como un proyectu nuevu...?
Cuando la Guardia Civil salió del periódicu cola última detención, la mía, yá había xente manifestándose dende les seis de la mañana. Al empar, nuna asamblea de trabayadores del diariu tomen dos determinos: qu’una parte se diba dedicar a llabores de propaganda, como organizar una manifestación, y a esplicar a tol mundu qué pasó, y qu’otru grupu diba dedicase esa mesma tarde a facer un diariu, Egunero, que foi un periódicu ponte ente Egunkaria y Berria, pa que los nuestros llectores tuvieren informaos de la situación y nun perdieren el so periódicu n’eusquera. El diariu salió esa mesma tarde. Foi un diariu de 16 páxines que salió dellos díes. Yera un diariu de transición, pero bien llueu se punxeron les bases pa crear Berria. Egunkaria ciarróse en febreru y Berria nació en xunu pa cubrir el güecu d’Egunkaria. Amás, ye un diariu que viende más, tien más páxines, más publicidá, más soscriptores y accionistes. Egunkaria tenía 1.500 accionistes y Berria 24.000. Nun habrá un periódicu nel mundu que tenga tantos accionistes y ye asina por cuenta de la reacción de la xente. 400 ó 500 d’esos accionistes son catalanes y otru mediu centenar norteamericanos y suramericanos que nun saben eusquera. Punximos les acciones a la venta n’Internet esplicando por qué se quería abrir un diariu nuevu y cómo ciarraren l’anterior y la xente solidarizóse al conocer la situación. Punxímonos l’oxetivu de llegar a los cinco millones d’euros y consiguimos 4.800.000 euros, que ye cuasi la meta que marcáremos.

¿Mantién Berria la mesma llinia editorial qu’Egunkaria?
Sí. Diríxelu’l mesmu director, el 95 por cientu de los trabayadores d’Egunkaria integráronse en Berria, y mantenemos la mesma llinia, el mesmu criteriu de noticies, como fiximos siempre: un diariu vascu, vasquista. Nunca diximos que sía nacionalista, pero sí nacional, y que los vascos tenemos derechu a decidir el nuestru futuru. Ye un diariu que defende la promoción del eusquera y ye bastante esixente no que ye l’aplicación de la normativa sobre la presencia del eusquera en tolos ámbitos. Al empar, somos un diariu que nos llevamos meyor colos palestinos que colos israelinos, colos saharauis que colos marroquinos, colos sindicatos que cola patronal, colos movimientos antiglobalización que con quien promueve esta globalización. Nun somos un diariu d’esquierda nel sentíu de les consignes típiques y tópiques, pero sí somos un diariu muncho más amigu de los sindicatos que de los empresarios, anque hai una parte importante del empresariáu que nos apoya, que son xente del país, saben la tierra que pisen y qué coses hai que facer. Somos independientes de partíos políticos, sindicatos, d’otros medios, del Gobiernu... Ye un diariu plural, abiertu, onde tou aquel que tenga dalgo interesante que dicir tien les páxines abiertes. Y procuramos mantener una llinia editorial na que toles persones que quieran lleer un diariu n’eusquera tean más o menos cómodes. Nengún mediu de comunicación nel mundu consigue que’l cien por cien de los usuarios tean d’alcuerdu col cien por cien de los conteníos, dalgo que seguro que-y pasa a LES NOTICIES, onde habrá quien pide más feminismu, otros menos sindicatos, etc. Eses quexes tenémosles nós, pero son les habituales na xestión d’un diariu: qu’un sindicatu sal más qu’otru, qu’a un partíu se-y da más cancha qu’a otru, qu’a mi siempre me saques cola foto fea… Otra manera, Berria ye un diariu meyor, más vistosu, más modernu, dalgo que tamién-y diba pasar a Egunkaria, pero nun-y dexaron. Amás, aprovechemos la crisis pa dar un reblagu y medrar. Ciarraron Egunkaria con 150 trabayadores y agora nació un grupu de comunicación con 300 trabayadores nel que collaboramos con ocho diarios locales n’eusquera, tenemos una web mui potente onde se dan ruedes de prensa en directo, facemos televisión per Internet y tenemos el diez por cientu d’una cadena de televisiones locales... Dupliquemos el númberu de trabayadores, lo que ye más economía, más dineru, más publicidá... Ello ye qu’a partir d’agora van tener que pensalo dos veces enantes de ciarrar un diariu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam