Sociedá

Maó conviértese en sé de los actos conmemorativos del Día d'Asturies nel Esterior

09/09/2010 a les 14:25:59

El Gobiernu d'Asturies, en collaboración col Centru Asturianu de Menorca, va festexar esti 9 y 10 de setiembre'l Día d'Asturies nel Esterior en Maó (Menorca). Esta celebración coincide coles fiestes patronales de Maó, polo que'l Centru Asturianu de Menorca instaló una caseta na zona de l'Autoridá Portuaria y el Gobiernu un stand con material de turismu pa promocionar na isla'l país.

Nesta ocasión, el Gobiernu ta representáu pol so presidente, Vicente Álvarez Areces, al qu'acompañen la conseyera de Presidencia, Xusticia y Igualdá, María José Ramos Rubiera, y la directora de l'Axencia Asturiana d'Emigración, Begoña Serrano Ortega.

El programa principa esti xueves 9 de setiembre, a les 19.30 hores, cola visita del presidente del Principáu, Vicente Álvarez Areces, a la caseta del Centru Asturianu, onde va tar acompañáu del presidente del Consell Insular de Menorca, Marc Pons, y del alcalde de Maó, Vicenç Tur. A les 20.30 hores, l'asturianía va dexase sentir con intensidá especial en Maó con un conciertu nel que, amás de contar cola participación del alumnáu de la Escuela d'Asturianía, tanto de la sección de baille como de la de gaita, van actuar dos figures musicales: Víctor Manuel y Héctor Braga.

Esti vienres 10, va celebrase un actu oficial nel salón de Plenos de la sé del Consell de Menorca en Mahó, onde van intervenir el presidente d'Asturies, Vicente Álvarez Areces y el de Baleares, Francesc Antich. La celebración del Día d'Asturies nel Esterior va acabar con una espicha popular entamada pel Centru Asturianu de Menorca y que va facese na Plaza de la Conquista.

El Día d'Asturies nel Esterior entámase de forma rotativa ente los centros allugaos n'España, nel restu d'Europa y n'América. Desque empezó a celebrase hasta anguaño, yá foron sedes del Día d'Asturies nel Esterior Madrid, Buenos Aires, Bruseles, A Coruña, Laussane (Suíza) y los centros asturianos de Chile.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam