Cultura

Luis Mario Arce presenta ún de los llibros más completos sobre la ría de Villaviciosa

26/08/2010 a les 10:49:34

Con cuasi 300 páxines a color, el llibru Entre aguas y mareas. Historia natural y geografía humana de la ría de Villaviciosa del periodista Luis Mario Arce, nun podía presentase d'otra manera. A les 11.30 del vienres 27 d'agostu, l'autor fairá de guía a traviés de los paisaxes que retrata na so obra. El percorríu, que sal de la sede de la Fundación José Cardín y tien parada nel Centru d'Interpretación, va a durar una hora y va a llegar hasta El Puntal, onde s'ufrez un pinchu marineru.

El llibru cunta con más de 120 semeyes, 30 illustraciones, mapes, cuadros y gráficos sobre la vida natural del entornu de la ría. Luís Mario Arce fala d'ella como «una obra de síntesis, un compendiu de conocimientos de diferentes tipos sobre l'estuariu».

Luis Mario Arce ye de les persones que meyor conocen esti llugar. Lleva cuasi 30 años mirando pales aves y la flora. Ye miembru de la Sociedá Española d'Ornitoloxía (SEO/Birdlife) y dirixe'l grupu asturianu. Periodista de coral naturista, esti nun ye'l primer llibru qu'asoleya sobre'l tema. En 1996 yá publicara La ría de Villaviciosa. Guía de la naturaleza. Nes nueve publicaciones que sacó siempre tuvo dalguna referencia a la natura d'esta fastera.

«La ría foi siempre un espaciu privilexiáu pa la observación de les aves, un llugar d'alcuentru, familiar y sorprendente, cola vida xabaz. Un paraísu cercanu, marcáu polos resclavos del home y arrodiáu poles sos obres», desplica'l periodista uvieín nel prólogu, y amesta que ye «un espacio ente agües y marees nel que alcuentra'l so hábitat una amplísima variedá d'organismos y al so amparu construyóse la identidá, cuasi diría qu'el carácter, del pueblu maliayu».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam