Asturies

Los votos de PP y PSOE echen abaxo la Llei de Presupuestos y obliguen a prorrogar los del 2011

IVÁN GARCÍA. UVIÉU - 26/01/2012 A LES 09:08:34

El desenllaz de los presupuestos pa 2012 foi la crónica d’una muerte anunciada. Anque Gobiernu y oposición coincidieron n’acolumbrar un futuru complicáu, nun foron quién a ponese d’alcuerdu pa evitar una prórroga presupuestaria. Anque siguió la lliturxa ente PP y Foru Asturies d’apurrir la mano ún al otru, los votos en contra de parte de la oposición valtaron el proyectu de presupuestos del Gobiernu na sesión plenaria del 25 xineru. El resultáu foi l’esperáu. La enmienda a la totalidá del Proyectu de Llei del Principáu d’Asturies de Presupuestos Xenerales pal 2012 presentada pol PP recibió l’apoyu del PSOE y la abstención IX-Los Verdes, polo que los 16 votos de la formación d’Álvarez-Cascos nun foron abondo pa que’l proyectu saliera alantre.

D’esta manera, l’Executivu autonómicu vese obligáu a siguir xestionando les cuentes al traviés de la prórroga qu’entró en vigor el 1 de xineru. Ye’l presupuestu aprobáu pol anterior equipu de Gobiernu del PSOE-IX, del que l’Alministración actual dixo que nun valía «pa sostener un programa de cambiu real».

Na sesión plenaria, el conseyeru de Facienda, Ramón del Riego, responsabilizó a los populares de que nun s’aprobara’l presupuestu. Del Riego manifestó que lo que taba en xuegu yera «si s’escueye un presupuestu real (el qu’ellaboró’l Gobiernu) o’l que fixeron PSOE y IX l’añu pasáu, que contién falcatrúes contables, mentires y engaños». El responsable de les cuentes autonómiques destacó que la falta d’un presupuestu pal 2012 abre una etapa d’inseguranza n’Asturies, «pa les empreses y pa los ciudadanos. Porque’l presupuestu del 2011 nun ye abondo pa facer frente a los gastos». Y alertó de que nun se van poder cubrir bona parte de les necesidaes que se xeneren en gastu social, sanidá o na Llei de la Dependencia. El responsable de Facienda defendió nel discursu’l proyectu de presupuestos del Gobiernu, que calificó de «real y non virtual». Según esplicó, les cuentes «respeten el gastu social y son respetuoses cola estabilidá y la consolidación fiscal y dan solución al déficit del 2010». Ye un presupuestu que «da respuesta a los problemes sociales y d’inversión pública n’Asturies», concluyó.

La oposición
Pela so parte, la oposición defendió la necesidá de facer otru proyectu onde se contemplaren «unes previsiones más creíbles y averaes a un contestu económicu que s’acolumbra difícil». Dende les files populares recordáron-y al Gobiernu los esfuercios que fixeron nes últimes selmanes pa llegar a alcuerdos. La so portavoz, Isabel Pérez-Espinosa, pidió-y a Álvarez-Cascos «que se dexara ayudar» y que dexara que los demás «collaboren en sacar a la rexón alantre». «Eso ye una muestra de grandeza y non de debilidá», remarcó Pérez-Espinosa.

El PSOE, nuna intervención curtia dende l’escañu del so portavoz d’Economía, Álvaro Álvarez, criticó que’l Gobiernu «nun quier llegar a nengún alcuerdu» p’aprobar les cuentes del 2012 y refertó al Executivu que nun fixera otro que «cubrir el trámite». Tamién recomendó al Gobiernu que s’entendiera col PP pa llegar a pactos que dean estabilidá a Asturies. Otra manera, el portavoz d’IX-Los Verdes, Jesús Iglesias, foi mui críticu col proyectu de presupuestos, que calificó de «provisional» por tar pensáu pa que se modifique a lo llargo del exerciciu según l’escenariu económicu que se presente. Amás, indicó qu’al proyectu presupuestariu sobráben-y más de 300 millones d’euros y faló d’un «problema de credibilidá».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam