Asturies

Los recortes de personal interinu desaten les crítiques a la política educativa del Principáu

25/08/2010 a les 16:27:33

El prósimu cursu escolar arranca con un recorte de places palos profesores interinos, a pesiar de que la Conseyería d'Educación, qu'agora dirixe Hermininio Sastre, diz que caltién el personal necesariu pa garantizar el serviciu públicu. Los interinos suponen el 15% del profesoráu de la educación asturiana.


Los mayestros de secundaria van a tener menos posibilidaes d'algamar un puestu d'interinu. El sindicatu ANPE facía una comparativa por especialidaes de les places ufiertaes pa secundaria nel añu 2009 pela mesma fecha. Asina, por exemplu, de 70 a xornada completa qu'había pa Xeografía y Historia l'añu pasáu, esti añu queden en 16. Daqué apaecíu pasa coles de Matemátiques, que baxen en 42 places; Llingüa Castellana y Lliteratura con 36 menos o Bioloxía con 32. Tamién nótase enforma, en Física y Química, Dibuxu y Francés.


En xeneral puede vese que mentes aumenten de manera llixera les places a media xornada, les de xornada completa queden en cuasi la metá. Los datos que da otru sindicatu del sector, SUATEA, con respectu del cursu anterior cifren les places «de 1714 del curso 2009-2010 a sólo 1418 pal próximu» Pero d'estes, namás «600 son medies xornaes, más del 42%, cuando lo habitual solía tar alredor del 33%».


ANPE alvierte qu'«esta reducción tan brusca nes contrataciones nun va a dexar caltener un serviciu de calidá na enseñanza d'Asturies» y pidi «el mantenimientu de les plantilles del cursu pasáu, que ya sufrieron un recorte considerable», sobre manera pa especialidaes relacionaes cola atención a la diversidá, como Pedagoxía o Audición y Llingüaxe.


Pel so llau, SUATEA califica la situación de «caos completu» y denuncien los errores qu'el Principáu fizo na ellaboración de les llistes, poniendo n'evidencia'l sistema informáticu que diba a dar les prioridaes a la hora d'escoyer el destín. Tamién el Bloque por Asturies fizo referencia al fechu de que «los dos primeros díes pa solicitar les places foi casi imposible facelo per Internet» y esto «obligó a munches persones a volver de vacaciones y en munchos casos facer cientos o miles de kilómetros pa ponese a la fila nel rexistru del Principáu» pola recomendación de la Conseyería d'Educación de facelo en papel y de mou presencial. A too esto hai que sumar «los recortes del gobiernu asturianu en servicios básicos supunxo qu'a los trabayadores de l’alministración-yos baxaren los sueldos», amesta'l Bloque.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam