Les Noticies.com. Diariu dixital. 17-05-2012
Los periodistes d'Avilés llamenten el fin del selmanariu LES NOTICIES
REDACCIÓN. UVIÉU - 03/02/2012 A LES 12:25:21L'Asociación de Profesionales de la Comunicación d'Avilés (APCA) acaba de mostrar públicamente'l so pesar pol cese, esti vienres, de la edición en papel de LES NOTICIES. Nel so comunicáu quieren espresar «tol sofitu a los compañeros qu'hasta güei mesmo fixeron posible la presencia d'esta cabecera nos quioscos. A ellos deseyámos-yos que'l periodu de transición qu'agora van encarar na publicación sía granible y col menor impactu posible nel empléu y nes condiciones de trabayu».
La desaparición de LES NOTICIES de los quioscos, a xuiciu de l'APCA, «vien a sumase a la llarga llista de fechos negativos que se tán asocediendo nel nuestru sector nos últimos tiempos, y que son la evidencia de que l'actual coxuntura de crisis ta poniendo en seriu peligru non yá miles de puestos de trabayu, sinon los mesmos pegollos de la profesión periodística». L'asociación avilesina recuerda la inseguranza sobre'l futuru de medios como la RTPA o'l diariu La Voz de Asturias que provocó que los profesionales acabaren de «rehenes» –tean o non integraos nos sos respectivos cuadros de personal– y se vean «obligaos a tratar de caltener la dignidá del llabor periodísticu en condiciones d'estrema precariedá, inclusive ensin ingresar el so salariu dellos meses».
Depués de mentar los recortes, despidos, precarización y fin de medios como Oviedo Televisión, Punto Radio o Cuencas Mineras Televisión, l'APCA destaca'l fechu de que tamos «nun momentu de transición y adaptación de la nuestra actividá a nuevos formatos. Hasta agora, les estratexes desenvueltes poles empreses pa encarar tanto la crisis económica como esa transición tecnolóxica, tuvieron como resultáu l'empeoramientu de les condiciones de trabayu y l'acabamientu de los valores que fixeron del periodismu ún de los pegollos de les sociedaes democrátiques».
La desaparición de la cabecera en papel de LES NOTICIES supón pa esta asociación de profesionales «una notable perda de pluralidá nel panorama de los medios de comunicación n'Asturies». «Ciárrense quince años de periodismu impresu íntegramente n'asturianu y, polo tanto, ciárrense quince años d'una forma de ver y contar la realidá d'Asturies», espliquen.
La nota de l'APCA acaba faciendo un llamáu «non yá a los profesionales del sector, sinón tamién a la sociedá asturiana, pa que tome conciencia del riesgu qu'implica'l procesu d'estrema precarización que vive'l sector pa la pervivencia d'un periodismu rigorosu, plural y éticu».
Comentarios fechos (1)
Nuberu 03/02/2012 a les 13:23:28
Si la TPA fuese una television como tien que ser una television autonomica y asturiana,los asturianos llevariamosla´n volandes,pero dedicaronse a esti estropiciu de xestion ya programacion,ensin respetar lo mas minimu nos informativos nin tan siquiera la toponimia,y nin que de falar dalgun informativu n´asturianu,eso si a facer de cortafueos de lo asturianu y la nuesa llingua,y asina non,asina ye loxicu que la xente nun tea pol llabor de mantener esto.Otra tele si ye posible,esta TPA non.
27/04/2012 - La Vuelta a Asturies sigue ensin usar la toponimia oficial nes notes que manda a la prensa
19/04/2012 - El diariu «La Voz de Asturias» ciarra depués de 89 años d'esistencia
08/05/2012 - Sal a la venta l'añada 2010 de L.lumés, el primer vinu etiquetao n'asturianu
11/05/2012 - La Gascona celebra esti domingu 13 la Preba de la Sidra
14/05/2012 - Una mesa redonda va tratar el futuru del asturianu na Universidá
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
