Llingua

Los medios de comunicación d'Asturies inoren la toponimia oficial

DAMIÁN BARREIRO. UVIÉU - 24/01/2012 A LES 11:45:05

El 9 de payares del 2011, nel marcu de les Xornaes d’Estudiu de l’Academia de la Llingua Asturiana, los periodistes Próspero Morán y Inaciu Galán presentaron la comunicación La toponimia asturiana nos medios de comunicación: situación y perspeutives. Nella dicen que ye difícil facer normal l’usu de los nomes de llugar fuera d’un procesu que nun incluya la normalización del idioma nel que s’espresen. Y ye que, desque nel 2004 el Gobiernu asturianu creó la Xunta Asesora de Toponimia, yá se recuperaron un total de 15.090 topónimos tradicionales. Sicasí, l’usu d’estos nomes ye cuasi nulu nos medios de comunicación, que lo dexen pal curtiu porcentaxe d’espacios fechos n’asturianu. Namás destaquen casos como los de L’Angliru –etapa de la Vuelta Ciclista a España– y los topónimos de los llugares que son Premiu Pueblu Exemplar al usar eses formes Felipe de Borbón.

Y too ello a pesar de que, según nos indiquen dende la Oficina de la Llingua de Xixón, los medios de comunicación recibieron los decretos namás qu’estos s’aprobaron nel BOPA. «Unes veces usen unos y otros non, parezme que depende del criteriu del redactor», esplica María Xosé Rodríguez, responsable del serviciu. Per otru llau, Penélope Miranda, de la oficina de L.lena, comenta que tamién unviaron la información a los medios y a les empreses de tresporte, «pero nesti momentu namás ta respetándolo’l periódicu local La Voz de Lena». Miranda diz que, siempre que tien oportunidá, fala colos periodistes pa informalos de qu’usar otres formes que nun sían les oficiales ye lo mesmo qu’escribir con faltes d’ortografía. «Por eso agora tán usando L.lagüezos nel sitiu de Chagüezos o Llagüezos. Sicasí, tengo constancia de qu’hai profesionales que tienen órdenes de nun usar los nomes recuperaos», indica. Otra manera, Montse Machicado, encargada de la Estaya de la Llingua d’Avilés, cuenta que se punxo en contactu col serviciu de comunicación del Conceyu y mandó los decretos a toles Conceyalíes, «pero dicen que pa que puedan usar la toponimia oficial necesiten una carta de l’alcaldesa que lo permita».

Medios públicos
Según esplicaron nel so momentu dende RTPA a esti selmanariu, «TPA Noticias y El Tiempo son escupulosos dafechu cola rotulación y l’usu de la toponimia asturiana, hasta’l puntu de que foron felicitaos va poco polos responsables de la Xunta de Toponimia». Sicasí, al sintonizar la radio pública, podemos comprobar que l’usu del noménclator oficial ye inexistente y los nomes tradicionales namás queden recoyíos nos programes que s’emiten na llingua del país. Otra manera, nel casu de la televisión, en programes como TPA Noticias o Conexión Asturias, sí que se respeta mayormente la toponimia oficial na rotulación. Sicasí, de manera oral cuasi nun s’usa y namás s’utilicen los deturpaos, anque los topónimos sían oficiales namás na forma tradicional, como puen ser los casos de L’Infiestu o A Caridá. Per otru llau, nel restu de la programación namás s’usen les formes anteriores a los decretos.

RTVE tampoco nun usa la toponimia oficial, nin siquiera nes desconexones p’Asturies. Too ello a pesar de que’l Mandatu-marcu pa RTVE, vixente dende’l 2008, diz que la Corporación ha ser especialmente escupulosa nel respetu a la toponimia «conforme a la llegalidá vixente». Amás, esplica que RTVE va dir actualizando, «de forma permanente», el so Manual d’Estilu pa correxir los errores detectaos na utilización por parte de los sos profesionales. María Alonso, directora del Centru Territorial d’Asturies, esplica que nesti asuntu nun usen un criteriu mui rigorosu: «La mayoría somos castellanofalantes que trabayamos nuna televisión estatal, polo que vamos un poco por llibre. Amás, facemos noticies qu’a veces van emitise fuera d’Asturies y puen xenerar baruyu nos compañeros de Madrid». Otra manera, diz que, anque tienen presente’l procesu, existe «desconocimientu y confusión, amás de la tradición d’usar les formes castellanes». «Faltaba que se punxeren en contactu con nós y nos dixeren que la norma ye esta, falta política llingüística hacia los medios», esplica Alonso, que reconoz que dacuando puen sentise nes emisiones formes como Grado «que rinchen un poco na oreya».

Prensa privada
LES NOTICIES púnxose en contactu cola dirección de los tres diarios asturianos, amás de con Radio Asturias, Cope d’Uviéu y Canal 10 de Xixón. Sicasí, al ciarrar la edición escrita namás se recibiera respuesta de Mónica Yugueros, directora de la televisión local xixonesa. Según indica, en Canal 10 nun usen nengún criteriu: «Hai xente qu’utiliza les formes asturianes oralmente y asumímoslo como dalgo normal, pero nun tenemos nengún criteriu pa poner los rótulos en castellanu y n’asturianu». Otra manera, a falta d’una respuesta d’Íñigo Noriega, director d’El Comercio, el llibru d’estilu del grupu Vocento, al que pertenez el rotativu xixonés, esplica que nos medios publicaos n’autonomíes con llingua propia «han utilizase los topónimos na llingua respectiva», ensin establecer qu’esti idioma tenga que ser oficial, como sí fai’l diariu El País. A pesar de too, el diariu xixonés namás usa la toponimia oficial na sección Alitar Asturies, publicada n’asturianu. Les demás páxines siguen usando la toponimia non oficial.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam