Asturies

Los ecoloxistes presenten alegaciones al proyectu d’un nuevu parque eólicu en Bual

23/08/2010 a les 18:03:47

La Coordinadora Ecoloxista d’Asturies vien de presentar suxerencies nel trámite de consultes d’un nuevu parque eólicu en Bual, «col que yá van 16 nel conceyu con un total de 227 aeroxeneradores».


Esti nuevu parque tendrá nueve aeroxeneradores de 2,3 Mw y 80 metros d’altor de buxe y 90 díametros de rotor, «que se van asitiar en llugares tan nomaos como’l Picu del Cuco y próximos a menos d’un quilómetru a delles poblaciones».


Los ecoloxistes recuerden qu’en tol occidente hai previstos unos 96 parques que sumaran 1.451 aeroxeneradores, «colo que tendrán un efectu acumulativu al que sumar l’impactu de les llinies d’evacuación y les subestaciones eletriques». Asina, afirmen que la instalación tendría que sumase a la Evaluación d’Impactu Estructural.


Al empar, espliquen qu’estos parques suponen una perdida de la naturalidá pa numberoses especies: «na zona hai 73 aves y 29 mamíferos, ente ellos especies amenazaes como l’osu, afectando amás les viesques de Llanteiro y Urubio».


Señalen que los aeroxeneradores van ser visibles dende delles poblaciones y que’l so impactu nel paisaxe va ser grande, «tienen una altura asemeyada a un edificiu de 26 plantes, a lo que s’añade’l rellumar de les sos lluces intermitentes».


Tamién recuerden que pa la colocación de los aeroxeneradores y el so mantenimientu necesiten l’apertura de pistes mayores de 8 metros, onde dirán soterraes los cables d’evacuación. «Esto supón la destrucción del suelu y los sos usos habituales», afirmen.


«Asturies ye escedentaria en producción eléctrica y estos parques eólicos, xuntu a les nueve térmiques de gas previstes y les que yá esisten, van facenos más escedentarios, a la contra de los criterios de la lóxica enerxética», apunten pa finar.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam