Economía

Los complementos retributivos a los homes espliquen la resquiebra salarial ente sexos

24/02/2010 a les 09:18:29

La resquiebra salarial ente homes y muyeres respuende a bien de factores qu'ente toos ellos dan como resultáu un desequilibriu importante ente los ingresos masculinos y femeninos: los complementos salariales, los puestos de responsabilidá o les peores retribuciones de los empleos tradicionalmente femeninos son dellos de los causantes d'esta desigualdá, como punxo de manifiestu UXT el 22 de febreru pasáu por cuenta de la celebración del Día Européu pola Igualdá Salarial.

N'Europa, la resquiebra salarial ta nun 17 por cientu en perxuiciu de les muyeres; y nel Estáu español, nel 22 por cientu, anque la diferencia pue llegar al 30 por cientu dependiendo del tipu de contratu, edá o sector. Sicasí, tal como s'informa na axencia de noticies AmecoPress «el gran problema pa midir la discriminación salarial ye que nun hai estadística oficial». Los datos, indícase nesta axencia, sáquense de la suma de los sueldos y la división del resultáu ente homes y muyeres, de la que s'obtién la conocida resquiebra salarial.

Esta realidá analizóse'l llunes 22 de febreru nel Congresu de los Diputaos na xornada Igual trabayu, igual salariu, na que representantes d'UXT y CC OO afirmaron que «les muyeres fixeron tolo que teníen que facer, pero la igualdá salarial nun llega», informa AmecoPress. Al empar, el ministru de Trabayu, Celestino Corbacho, declaró que'l «desequilibriu nos sueldos ta causáu polos estereotipos».

Pela so parte, sindicatos y feministes recalcaron que la diferencia salarial ta orixinada principalmente nos complementos retributivos, que favorecen a los trabayadores penriba de les trabayadores y que se pacten al marxe de les negociaciones colectives. «Quier dicise: partiendo del mesmu salariu base, les empreses tienden a compensar con estres a los homes en cuenta d'a les muyeres», esplícase n'AmecoPress. Los motivos d'estos complementos pueden ser oxetivos, como la nocturnidá o'l plus d'antigüedá, o suxetivos, como'l rindimientu. Nesti sen, UXT informó de que, de media, el 66 por cientu del salariu masculín correspuende a los complementos salariales, mentes que pa les muyeres namás supón el 25 por cientu.

Igualmente, les muyeres, tal como señaló UXT, avecen a concentrase nos empleos peor pagaos y ocupen menos cargos directivos: malapenes el 40 por cientu de los cargos de responsabilidá de les empreses españoles tán ocupaos por muyeres, según un sondéu fechu pol Grupu Michael Page. Nesti informe apúntase que la muyer representa menos del diez por cientu de los puestos directivos de les empress. Amás, hai más muyeres trabayando a tiempu parcial pa poder dedicase depués a les sos responsabilidaes familiares.

Al empar, cuanto mayor ye'l nivel d'estudios y de formación, mayor ye la diferencia salarial: les trabayadores españoles con titulación superior perciben, de media, el 65,91 por cientu del salariu que cobren los homes nes mesmes condiciones. Otra manera, más del 40 por cientu de les muyeres trabayen nos sectores de la sanidá, la educación y l'alministración y dupliquen nestes árees al númberu d'homes. Sicasí, la representación femenina ye mui baxa en puestos de xestión y de toma de decisiones.

Na Unión Europea les muyeres namás ocupen el 32 por cientu de los puestos de xestión nes empreses, el 10 por cientu de los puestos nos conseyos d'alministración de les grandes compañíes y el 29 por cientu de los empleos científicos y tecnolóxicos, informa AmecoPress.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam