Cultura

Lorient: tercer día

11/08/2010 a les 11:13:03

Güei'l dia entamó orbayando, ye un de los díes que nun acompañen pa faer coses, y más cuando quies dir a faer un poco de turismu pela redolada d'esta ciudá. Ensin importamos el tiempu, tuviemos viendo Locronam y Quimper, nel vecín departamentu del Finisterre, en plenu País Bigoudan. Si queréis conocer un poco como ye de verdá Bretaña, recomiéndovos esta visita, el primer destinu ye un pueblín , bien turísticu nel que podeis topar un bon exemplu d'arquitectura popular bretona, anque anguaño, y más na época del añu onde tamos , tea bien estrao de xente, y el segundu llugar, Quimper, ye una de les villes más prestoses y típiques de Bretaña, onde vais poder caleyar, y char una güeyada a ún de los conxuntos arquitectónicos meyor conservaos de tola Bretaña (dígovos esto porque palos que nun lo sabeis, Lorient foi tirada abaxo peles bombes a la fin de la segunda guerra mundial, yera una de les más importantes bases de submarinos nazis, y entá podeis visitar la base de submarinos –que foi lo único que nun valtiaron–, a la vera del puertu de la ciudá. Nun tien nengún interés turísticu, namás qu'el festival, polo tanto podemos definila como la villa más fea de Bretaña...).

Güei, no musical, voi destacavos el conciertu de Breizh Balkanik: un trabayu d'una de les bandes de gaites (bagadous en bretón) más conocíes de toa Bretaña, y que dexó yá atrás el participar nos campeonatos de bandes (un acontecimientu en Bretaña, qu'incluso tien una clasificación en categories) pa entamar un camín nuevu d'espectáculos igüaos pola banda. Nesta ocasión, fixeron por xuntar la música bretona colos ritmos y músiques del Este d'Europa. Acompañaben al Bagad de Quimper nesta ocasión 7 músicos: un curdioneru, un saxofonista-clarinetista, una celista, un trompeta, un baxista y un vigulineru, aparte del famosu cantante bretón Erik Marchand (gran especialista en música bálcanica, que foi él el qu'asesoró al Bagad). Entamó'l conciertu con una parte na qu'el Bagad en conxuntu, sorprendíanos col dominiu musical y estilísticu que tienen. Les partes solistes correspuendíen a xente diferente, yá sea bombardes, gaites o percusión, onde podemos decir que casi tola xente tien nivel como instrumentista como p'asumir un papel importante. Pero les sorpreses llegáronnos cuando tola xente de la banda, regalónos un tema de 'percusión corporal' al más puru estilu Stomp o Manumayá, onde tolos miembros del bagad faíen percusiones y soníos cola boca p'arranchar poliritmies bien guapes, que dexaron al públicu bien sorprendíu pola diversión y complexidá de los mesmos.

Remató'l conciertu con dos cantares bien guapos, unu yerá un amiestu d'un kolo rumanu, que me paeció totalmente fiel al estilu orixinal de Rumanía, qu'empataben con un plinn bretón con toa naturalidá, nel qu'entamaba la percusión de caxes d'alta tensión típica d'esti tipu de formaciones, y cona voz d'Erik Marchand siempre presente. A mín mostróme'l conocimientu que tenía la xente que taba nel escenariu de les músiques que taben fusionando. L"otru cantar yera un cantar bosniacu, con un aire y tastu a pop, preciosu y que toos xuntos fixeron brillantemente. Yá nesti momentu les cincuenta persones que taben enriba l'escenariu taben pasándolo podre y demostrábenlo, baillando, blincando, fayendo coreografíes de los cantares. Esi ratu prestosu que taben teniendo, foi acompañau con tol Gran Teatru de Lorient en pie y dando palmes. Foi un gran espectáculu variáu, y sorprendente.

Depués, pudi ver un gran grupu de música pal baille Esquisse (yá veis como munchos grupos d'equí nun entienden la so música ensin que tea baillada...), grupu que fai música de l'Alta Bretaña (tol factor estílisticu ye perimportante porque marca los bailles y la manera de tocar de los músicos, cola riqueza que-yos da a los sos conciertos y al públicu que nun tá aburríu, sinón participativu), y que siendo un cuartetu bien mozu, combinen xunto a la musica tradicional del so llugar de Bretaña influencies del jazz, rock y músiques más actuales con una instrumentación que nun ye la de davezu, y que se compón de curdión diatónicu, clarinete, saxu y batería. Prestáronme muncho, yeren enérxicos y daben un sentíu diferente a la so música, condicionaos pela instrumentación que teníen.
Rematé na carpa d'Asturies oyendo a un grupu: Fatras, formación que tien la vertiente de cai, de «fanfare» que conoz como conectar cola xente (tengo ganes de velos pela cai estos díes) y la de grupu d'escenariu con un estilu ente la nouvelle chançon francesa y esi rock tan acústicu y manouche que tanto presta equí, con una formación base de batería, contrabaxu, guitarra acústica y eléctrica, voz, trompeta, saxu, y trombón, y ciertu recuerdu a bandes mítiques como Les Negress Verteses. Per guapo... Siguimos mañana.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam