Cultura

Loriant : el primer dii

10/08/2010 a les 10:16:09

Siempre cuando llego a Loriant , y entamo a baxar pela entrada que vien de l"autopista , ye una sensación pa mi de quien llega a un llugar conociu , nel que vas situando tolos pequeños requexos na memoria , y nel que vas comentando na to mente toles pequeñes igües que tienen a bien faer na su xeografia urbana. Vamos ye llegar a esi sitiu que davezu vas y sientes un migayín tuyu , y nel que te desenvuelves de memoria ensin entrugar ná a naide, y tando seguru de los tos movimientos, y de lo que vas topar al tornar la esquina.Dientro de too esto y del conocimientu que tienes sabese que el primer domingu de festival ye un de los que más xente vas topar na ciudá, sabes que si traes coche l"aparcar ye un llabor que nun ye fácil ( la repunancia de tener que dar delles , por nun decir munches vueltes pa topar un requexín onde dexar el to coche bien aparcau, y más depues de tar tola nueche despiertu , conduciendo pa llegar depués de un "bolu" en Celoriu ) , cais cortaes, y too porque ye la mañana del desfile de les naciones celtes :" un dii d"America n"Asturies" , a lo "celta", un desfile que recuerre la villa peles sos cais centrales , y onde sobretoo el turista domingueru puede ver , bandes de gaites y grupos folcloricos de tolos colores y venios de tolos llugares del "mundu celta", vamos que si yes amigu d"esti tipu de alcuentros vas pasalo como los indios , pero si como nel mi casu nun te presta el topar xente asgaya , va contribuir a que el mi nivel de repunancia medre. Cansau llegué a la carpa d"Asturies , que ye normalmente el puntu d"alcuentru de tolos asturianos que lleguen al festival pa topar a la xente que tienes que ver, y elli alcontreme con Andrea F. Joglar , una rapaza de 19 años que foi alumna de curdión mia, y que ye una talentosa gaitera y flautista, vien a Loriant a participar nel concursu McCrimmon de gaita, que tuvó llugar el sabadu, y por ella mesma enterome que foi la ganadora, toa una alegria , porque al mi parecer ye un de los músicos con más futuru d"Asturies , talentu y nervios d"acero xuntensen n"esta moza , lo que pa mi ye un valor seguru pa afrontar esti tipu de concursos. Ye la primer muyer que algama esti concursu ya sea nes modalidaes de gaita y gaita escocesa, o sea que acaba de char por tierra otru mitu : el que la gaita ye un instrumentu pa paisanos . Prestame pa que negalo, sé que el que Andrea gane esti concursu va xenerar polemiques, y comentarios de tou tipu, imaxino que comentarán que si ye daquien que nun se lo merez y que merezlo más esti otru o aquel , vamos les tipiques polemiques del mundu gaiteril , que munches veces apaecen , y que nun dexen de poner en duda les puntuaciones de un xurau cualificau, acusandolu de subxetivu ( coime que ye ¿que nun llamen a " suxetos" determinaos paque xuren nos concursos en base al su conocimientu del instrumentu ?, entos ¿porque cuesta tanto acatar les sus decisiones cuando nun son les que esperamos? , los xuraos son xuraos en base al su conocimientu y les sus opiniones son personales y deberien aceptase en base a ello ), de nueche Andrea participó tamien nun espectaculu que vieno a sustituir al conciertu suspendiu de la gallega Luz Casal ( motivos de salú pala suspensión), y que tuvó al grupu texanu llamau Grupu Fantasma ,a los sustitutos, faciendo música látina ( o eso decia el programa, yo nun pudi velo) , y que dexó bon sabor de boca entre los asistentes segun oyi. De tardi pudi sentir a una fanfarria bretona que la verda sea dicha prestome asgaya, una idea nueva del festival de conciertos pa que la xente sienta mientres nos escenarios tan ocupaos nes aburries y necesaries pruebes de soniu. Esta fanfarria podia definila como bretona con aires balcanicos , y con una instrumentación de curdión , bombu, fliscorniu , saxu , trompeta y trombón de , fizó una actuación que pa mi foi impecable, una perfecta mezcla de música de pais de Redón ( comarca bretona) mecia con unos arranchos y sonoridá balcánica, que demostraronme de verdá cual ye el terminu "fusión" , que basase nel conocimientu de les coses que quies "fusionar", cosa que delles veces n"Asturies escaecemos , y pensamos que " fusionar " ye meter instrumentos lletricos , o "loops" , escaeciendomos de que fusionar estilos implica el conocer los estilos que pretendemos mecer, y d"ehi partir . Asina foi como esta fanfarria reconociase perfectamente el estilu del "pais Redón" con una sonorida de les "fanfare " rumanes , lo que fexó que la xente baillaré alredor d"ellos , de manera natural , melodies y estilos de baille conocios pol publicu con arranchos nuevos, too esto ensin un escenariu y amplificación , colo que el contactu cona xente yerá total, nel más puru estilu de musica de cai, prestoso , prestoso. El dia dío pa poco más , resaltobos 2 conciertos que me prestaron y que pudí oyer a cachinos , por que les mis obligadciones musicales demandabenme ( tocar col grupu " Los Ciquitrinos "na carpa d"Asturies ) , el duu de los Freres Guichen , prestosa combinación de dos hermanos virtuosos cola curdión y la guitarra, y que son perconocios en toa Bretaña ,y los tamien perconocios Pennou Skoulm, grupu de musica pal baille de Bretaña , que xunten instrumentos ayenos a la tradición bretona ( dos vigulinos , flauta , gaita irlandesa y guitarra) y que nun dexen de sonar como netamente d"esti pais, colo cual demuestrase que nun son importantes los instrumentos , si non l"usu que d"ellos faese ( ¿que ye más asturiano un gaiteru tocando pieces escoceses, o un saxofonista tocando "Carretera d" Aviles " na versión de Xuacu el de Sama , imitando toles inflexiones y melismas de la so versión? ). ......... Continuara

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam