Sociedá

La llista d'espera quirúrxica del HUCA supera los dos meses y mediu

22/02/2010 a les 19:25:57

L'Hospital Universitariu Central d'Asturies (HUCA) rexistró un retrasu mediu na llista d'espera quirúrxica de 76 díes nel mes de xineru, colo que supera los dos meses y mediu d'espera y asítiase per enriba de la media del conxuntu de los hospitales del Serviciu de Salú del Principáu d'Asturies (Sespa), que foi de 69 díes nel primer mes del 2010.

Sicasí, el tiempu máximu d'espera d'un paciente nel HUCA ye de 209 díes, per debaxo de la media asturiana, que ye de 229 díes, según datos de les llistes d'espera estructurales que se publiquen nel portal Astursalud.

L'HUCA tien el mayor númberu de pacientes n'espera, con 6.649 de los 16.090 que se rexistraron en tola rede del Sespa. D'ellos, 4.170 esperen menos de 90 díes, 2.279 ente 91 y 180 díes, y 200 ente 181 y 365 díes.

Un día más de retrasu mediu que l'HUCA rexistra l'Hospital Valle del Nalón, con 77 díes, y una espera máxima de 179 díes. Esti centru hospitalariu de les Cuenques tien a fecha de xineru del 2010 un total de 1.874 usuarios en llista d'espera quirúrxica. La mayoría, 1.123, esperen menos de 90 díes, y el restu, 751, esperen ente 91 y 180 díes.

Ye l'Hospital Monte Naranco'l que rexistra menor tiempu d'espera media, con 52 díes, y namás tien 185 pacientes en llista d'espera, de los que 152 aguarden menos de 90 díes y 33 ente 91 y 180 díes. El tiempu máximu de retrasu ye de 171 díes.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam