Llingua

La llingua asturiana tuvo presente na XIV edición de los Premios de la Música

05/03/2010 a les 20:00:00

IVÁN G. FERNÁNDEZ, Madrid

La XIV edición de los Premios de la Música, que se celebró'l xueves 4 de marzu nel Teatru Calderón de Madrid, tuvo marcada pola reivindicación llingüística del asturianu cuando dos miembros de la banda Dixebra xubieron a recoyer el gallardón.

Los asturianos Dixebra, premiaos col Meyor Cantar en Llingua Asturiana, esixeron a los responsables políticos –asturianos y españoles– qu'igüen la situación de marxinación y d'apartheid que vive la llingua asturiana.

Otra manera, Xune Elipe y Jorge Cambareli quixeron dedica-y el premiu a tolos falantes d'asturianu, porque tán faciendo que l'idioma siga vivu güei. Amás, tamién ofrecieron el gallardón a los militantes de la reivindicación llingüística, porque gracies al so puxu y a la so xera dalgún día van vese reconocíos los derechos llingüísticos.

Ruper Ordorika llevó’l premiu al Meyor Cantar n’Euskera. La intervención de Ordorika, tres recibir el gallardón, fixo que’l publicu s’inquietare por dirixíse a ellos n’eusquera. D’otru llau, Quimi Portet y Bau, foron los ganadores del Meyor Cantar en Catalán y Gallegu, respectivamente. El cantautor gallegu acabó'l discursu diciendo que se sentía «arguyosu de ser gallegu nel únicu sentíu que tien la pallabra».

Otra manera, el triunfador de la nueche foi Adolfo Cabrales, más conocíu como Fito Cabrales, que llevó’l premiu al Meyor Álbum de Rock y a la Meyor Canción. L’otru trunfador de la nueche foi Miguel Poveda, que llevó los premios al Meyor Álbum y al Meyor Álbum de Canción.

El momentu más emotivu de la gala conducida por Alaska foi cuando s’entregaron los premios a Bebo Valdés y a Peret. El cubano, de 91 años, recibió esti merecíu homenaxe col premiu Latinu d’Honor y Peret foi reconocíu col premiu Toda una Vida, pola so dedicación a la música.

La nota de color púnxola una concentración del sindicatu CNT a les puertes del Teatru Calderón en protesta polos recientes despidos que llevó alantre la SGAE.

La gala va retresmitise, en diferío, el 5 marzu a les 22 hores per La 2 de TVE.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam